Վարշավայում կայանալիք ՆԱՏՕ-ի գագաթաժողովն ի՞նչ արդյունքներ կարձանագրի. այս հարցի շուրջ «Առաջին լրատվական»- ը զրուցեց քաղաքագետ Հայկ Մարտիրոսյանի հետ:
«Արդյունքների առումով դժվարանում եմ ասել, բայց այն, որ նախևառաջ քննարկվում է Վրաստանի հարցը, հետո որոշակի առումով կքննարկվի նաև Ոկրաինայի հարցը, դա փաստ է: Փաստ է նաև, որ այս գագաթաժողովն անթաքույց կերպով ուղղված է Ռուսաստանին դիմակայելուն և, ըստ էության, հաստատվելու է դե ֆակտո, այսինքն՝ փաստացի կայացվեց որոշում, որի համաձայն՝ 4 գումարտակներ պետք է տեղադրվեն Մերձբալթյան երեք երկրներում և Լեհաստանում: Փաստորեն սրանով Ռուսաստան-Արևմուտք հակասությունները ճանաչվում են նաև ռազմական դաշտում: Սա լուրջ ազդակ է՝ ուղղված Ռուսաստանին՝ ՆԱՏՕ-ի անդամ երկրների և նրանց ղեկավարների կողմից: Վրաստանի հանգամանքը նույնպես ուղերձ է Ռուսաստանին, և, ամենայն հավանականությամբ, կա՛մ ավելի բարձր համագործակցության ձևաչափ կսահմանվի, կա՛մ որոշում կկայացվի ինչ-որ պահի Վրաստանը ներառել ՆԱՏՕ-ի կազմ, որը Ռուսաստանի համար կլինի չափազանց լուրջ և ծանր քայլ»,- նշեց քաղաքագետը:
Անդրադառնալով դիտարկմանը, որ փորձագետները քիչ հավանական են համարում մոտ ապագայում անդամակցության գործողությունների պլանի տրամադրումը Վրաստանին՝ Հայկ Մարտիրոսյանը նշեց, որ դրանում կա բավականին մեծ ճշմարտության հատիկ, բայց միանշանակ այդպես ասելը դժվար է, քանի որ կուլիսներում ընթացող գործընթացներն անհնար է հասկանալ: Նրա խոսքով՝ տարածաշրաջանում և Եվրոպայում իրադարձություններն այնքան արագ են զարգանում, որ բացառված չէ, որ գործողություններն այդ ուղղությամբ նույնպես արագություն ստանան:
Ռուսաստանը պաշտոնապես կհայտարարվի՞ որպես սպառնալիք ՆԱՏՕ-ին, և դա ի՞նչ նշանակություն կունենա մեր տարածաշրջանի և Հայաստանի համար: Այս հարցերի վերաբերյալ մեր զրուցակիցը նշեց, որ Կովկասյան տարածաշրջանը միշտ է կարևոր հարթակ, ցավոք, Հայաստանում դա չեն հասկանում: «Ինչ վերաբերում է Ռուսաստանին պաշտոնապես հակառակորդ հայտարարելուն, ապա ՆԱՏՕ-ի անդամ առանցքային մի քանի երկրներ իրենց ռազմական դոկտրիններում կամ բարձրաստիճան պաշտոնյաների մակարդակով հայտարարել են, որ Ռուսաստանը հակառակորդ է: Այդ մասին հայտարարվի թե չհայտարարվի, դրանից մեծ բան չի փոխվում, վերաբերմունքն ակնհայտ է»:
Ի պատասխան այն հարցի, թե կա՞ վտանգ, որ Հայաստանը կարող է ներքաշվել այս դիմակայության մեջ, քաղաքագետը նշեց, որ Հայաստանն ընդհանրապես գտնվում է վտանգների գոտում. «Հայաստանը ՀԱՊԿ անդամ է և որևէ ինքնուրույն քաղաքականություն չի իրականացնում: Այսինքն՝ որ կողմից Հայաստանի դաշակիցները Հայաստանին ներքաշեն, այդպես էլ ներքաշվելու է, Հայաստանն այլևս որպես կիսաչեզոք երկիր չի դիտարկվի»:
Մանրամասները՝ տեսանյութում:
