Համաշխարհային կախվածությունը մերձավորարևելյան նավթից աճում է, քանի որ արտահանողները չեն կարողացել պայմանավորվել արդյունահանման զսպման շուրջ՝ ցածր գների ֆոնին։ Այս մասին Financial Times-ի հետ զրույցում ասել է Միջազգային էներգետիկ գործակալության ղեկավար Ֆաթիհ Բիրոլը։
Նրա խոսքով՝ ներկայում Սաուդյան Արաբիան և Իրաքն ունեն նավթի շուկայի խոշորագույն մասնաբաժինները։ Նրանց մատակարարման պահանջարկն աճում է ԱՄՆ-ի, Կանադայի և Բրազիլիայի կողմից արդյունահանման կրճատման ֆոնին՝ հումքի ցածր գների պատճառով։
«Մերձավոր Արևելքը ներկրման առաջին աղբյուրն է։ Որքան բարձր է պահանջարկը, այնքան ավելի շատ ենք մենք (ներկրող երկրները) ստիպված ներկրել»,- ասել է Ֆաթիհ Բիրոլը։
Մերձավորարևելյան երկրները ներկայում արտադրում են նավթի գլոբալ ծավալի 34 տոկոսը՝ արդյունահանելով օրական միջինը 31 մլն բարել։