Արարատի և Վայոց Ձորի մարզերի ընդհանուր իրավասության դատարանում Լևոն Արազյանի նախագահությամբ ավարտվել է Արմեն Ստեփանյանի գործի դատական քննությունը:
31-ամյա Արմենը երկու անչափահաս երեխաների հայր է, զբաղվել է մասնավոր աշխատանքներով: Նրան մեղադրանք էր առաջադրված խմբի կազմում շահադիտական դրդումներով կատարած սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ և 8-րդ կետերով:
Ըստ մեղադրանքի՝ Արմեն Ստեփանյանը գործով չպարզված անձանց հետ նախնական համաձայնությամբ, շահադիտական դրդումներով դիտավորյալ կյանքից զրկել է իր համագյուղացուն՝ Արարատի մարզի Այգեստան գյուղի բնակչուհի Հերմինե Գ.-ին, ով երբեմն տոկոսով փող էր տալիս:
2014 թվականի սեպտեմբերի 7-ին, ժամը 17-ից մինչև հաջորդ օրվա առավոտ Ստեփանյանն ու անհայտ անձինք ցանկապատից ապօրինի մուտք են գործել Հերմինե Գ.-ի բակ, բացել են մուտքի դուռը, ներխուժել են տուն:
Ննջասենյակում հարձակվել են անկողնում պառկած կնոջ վրա: Հարվածել են նրա գլխին ու մարմնի տարբեր մասերին, պատճառել են առողջության ծանր վնաս՝ գանգուղեղի փակ, բութ տրավմա, արյունազեղումներ:
Ծանր վնասվածք ստացած կնոջը գցել են անկողնու վրա: Ապա սավանը պատռել, կապել են նրա ձեռքերը, բութ, կոշտ առարկայով վնասել են տարիքով, չամուսնացած կնոջ… հեշտոցի շրջանը: Ավազակային հարձակմամբ հափշտակել են կնոջ կրած ոսկեղենը՝ մատանին ու ականջօղերը՝ 153 հազար դրամ ընդհանուր արժողությամբ:
Վերջում սեղմել են կնոջ պարանոցը, խեղդամահ են արել ու, վերցնելով հափշտակված ոսկեղենը, փախել են:
Դատարանում ամբաստանյալ Արմեն Ստեփանյանն իրեն մեղավոր չի ճանաչել: Նա հայտնել է, թե աշխատել է Արտաշատ քաղաքի հիվանդանոցի մոտ գտնվող օբյեկտում: Իր հետ աշխատել են նաև իր համագյուղացիներից:
Սեպտեմբերի 7-ին դիմավորել է զոքանչին, աշխատանքն ավարտել է ժամը 21-ի սահմաններում: Տղաներին տաքսիով ճանապարհել է գյուղ, ինքը գնացել է հիվանդանոց՝ այնտեղ պառկած կնոջ մոտ: Մնացել է մոտ կես ժամ, հետո տաքսիով գնացել է տուն:
Ժամը 24-ի սահմաններում գնել է ծխախոտ, մի քանի շիշ գարեջուր, իջել է իրենց տան նկուղ, որտեղ աղավնիներ է պահում: Գարեջուրը խմել է, մի ժամ հետո տուն է գնացել ու քնել է:
Հաջորդ օրը մայրն արթնացրել է վաղ առավոտյան: Վերցրել է գործընկերներին, տաքսիով գնացել են Արտաշատ: Այնտեղ են եղել ժամը 7-8-ի սահմաններում:
Կնոջն ասել է, թե գումար չի ճարել: Կինը զանգել է եղբորը, գումար է խնդրել: Ինքը մի քանի րոպե է մնացել կնոջ մոտ:
Հետո գնացել է Երևան: Զանգել է իր ընկեր Արսենին, ասել է, թե ոսկի կա գրավ դնելու, բայց իր անձնագիրը չի գտնում, խնդրել է այդ հարցում օգնել: Հանդիպել է Արսենին: Նա ընկերոջ անունով գրավադրել է ոսկեղենը, 63 հազար դրամը տվել է իրեն:
Ինքն իր համար հագուստ է գնել, քանի որ բանվորական շորերով է եղել: Այդ հագուստի վրա ծախսել է զոքանչի տված 3 հազար ռուբլին:
Հետո գնացել է եղբոր տուն, վերցրել է 160 կամ 170 հազար դրամ: Վերադարձել է Արտաշատի հիվանդանոց, բժշկին է տվել 170 հազար դրամ, կնոջը դուրս են գրել:
Պատահական տաքսիով կնոջ, մոր ու երեխաների հետ վերադարձել է տուն և տանից դուրս չի եկել:
Հաջորդ օրը գնացել է աշխատանքի: Գործընկերոջ տատիկը զանգել ու տեղեկացրել է, որ համագյուղացի Հերմինեին տան մեջ սպանել են:
Արմեն Ստեփանյանը նշել է, որ եղել են դեպքեր՝ տուժող Հերմինեն իրեն գումարով օգնել է, եղել են դեպքեր՝ ինքն է նրան օգնել: Երբ գումար չի ունեցել, Հերմինեն իրեն է տվել իր ոսկեղենը, որ գրավ դնի, հետո վերադարձնի: Հերմինեն միշտ ցանկացել է օգնել իրեն:
Ինքը Հերմինեին վերջին անգամ հանդիպել է սեպտեմբերի 5-ին: Պարտքով փող է խնդրել: Հերմինեն փող չի ունեցել, տասն օրով իրեն է տվել իր ոսկե զարդերը ու խնդրել է, որ ժամանակին վերադարձնի:
Հենց Հերմինեի տված ոսկեղենն է ինքը գրավադրել Երևանում: Այդ ոսկեղենը հետագայում ճանաչվել է Հերմինեի հարազատների կողմից…
Ըստ Արմենի՝ Հերմինեն ասել էր, թե մահճակալ է վաճառում, ինքը մոր հետ գնացել է մահճակալը տեսնելու, հնարավոր է՝ այդ ժամանակ է մահճակալի վրա կամ նրա տան գույքի վրա թողել իր մատնահետքերը…
Ինքը Հերմինեին չի սպանել, իսկ ոսկե զարդերը Հերմինեն իրեն է տվել սեփական ցանկությամբ…
Նախաքննության ժամանակ Արմենն ասել էր, թե համագյուղացի Հերմինեի հետ բոլորովին չի շփվել, միայն իմացել է, որ նա տոկոսով փող է տալիս, սակայն ինքը նրանից գումար չի վերցրել, անգամ չգիտի, թե նրա տունը քանի սենյակ ունի…
Տուժողի եղբայրը հայտնել է, թե Հերմինեին վերջին անգամ տեսել է սեպտեմբերի 7-ին, ոսկեղենը նա կրում էր, հետևաբար չէր կարող սեպտեմբերի 5-ին իր մատանին ու ականջօղերը տված լինել Արմեն Ստեփանյանին…
Դատարանը Արմեն Ստեփանյանին մեղավոր է ճանաչել ՀՀ քրեական օրենսգրքի 104 հոդվածի 2-րդ մասի միայն 8-րդ կետով՝ շահադիտական դրդումներով դիտավորյալ սպանության համար: Իսկ խմբի կազմում սպանությունը կատարված լինելը ՝ նույն հոդվածի նույն մասի 7-րդ կետով, դատարանը հաստատված չի գնահատել, քանզի որևէ մեկը, բացի Արմեն Ստեփանյանից, բացահայտված չէ գործի քննությամբ:
Արմեն Ստեփանյանը դատապարտվել է 15 տարի ազատազրկման: Պատժի սկիզբը՝ 2014 թվականի նոյեմբերի 19-ից:
Պատժի կրման ընթացքում Արմեն Ստեփանյանի նկատմամբ նշանակվել է հարկադիր բուժում, քանի որ նրա մոտ ախտորոշվել են հոգեկան ու վարքային խանգարումներ, թմրանյութերի և այլ հոգեակտիվ նյութերի համակցված գործածության հետևանքով կախվածության համախտանիշ:
