Միջազգային ճգնաժամային խումբը (ՄՃԽ) զեկույց է հրապարակել Ղարաբաղյան հակամարտության վերաբերյալ, որում անդրադարձ է կատարվել ապրիլի 2-5-ը Ղարաբաղյան հակամարտության գոտում ծավալված մարտերին:
«Մարտերում երկու կողմից սպանվել է մինչև 200 մարդ: Մարտերը ազգայնական ուժգին զգացմունքներ են առաջացրել երկու երկրներում էլ: Ադրբեջանը գրավել է ոչ մեծ, սակայն ռազմավարական կարևորության տարածքներ»,- ասված է հայտարարության մեջ:
Զեկույցը մեծապես կարևորել է հակամարտության կարգավորման վերաբերյալ առաջընթացը բանակցությունների ընթացքում, համոզմամբ, որ ռազմական էսկալացիայի վերսկսումն ըստ ամենայնի կլինի ավելի կործանարար, քան ապրիլին էր, և գոյություն ունի ռիսկ, որ այդ դեպքում կօգտագործվեն մեծ հեռահարության «երկիր-երկիր» դասի հրթիռներ, և զոհերի թիվը կլինի ավելի մեծ, հատկապես քաղաքացիական բնակչության շրջանում:
«Ռազմական գործողությունների արդյունքում՝ Հայաստանի և Ադրբեջանի հասարակությունն ապրիլին ավելի շատ է պատրաստ եղել ռազմական լուծմանը, քան վերջին 25 տարում երբևիցե:
Ռուսաստանն իրեն դիտարկում է որպես այդ հակամարտությունում տարածաշրջանային դատավոր, իսկ Թուրքիան էլ Ադրբեջանի հետ ծավալել է ռազմական համագործակցություն, էներգետիկ առանցքային գործընկերություն, քաղաքական ու տնտեսական սերտ հարաբերություններ: Թուրքիան Հայաստանի հետ դիվանագիտական հարաբերությունների վերականգնումն ու սահմանի բացումը, շաղկապում է (Ղարաբաղյան) հակամարտության կարգավորման հետ:
Մոսկվան Ղարաբաղյան հակամարտության հարցում ներկայանում է որպես առանցքային միջնորդ և անվտանգության երաշխավոր, ինչպես նաև ձգտում է ամրապնդել իր ռազմավարական դերը տարածաշրջանում, որը նա համարում է իր արտոնյալ շահերի գոտի»,- իրավիճակն այսպես է ներկայացվում հայտարարությունում:
Զեկույցում հիշատակվում է մայիսի 16-ին Վիեննայում և հունիսի 20-ին Սանկտ Պետերբուրգում Հայաստանի ու Ադրբեջանի նախագահների հանդիպումների մասին, ընդգծվում է, որ ԵԱՀԿ Մինսկի խմբի բոլոր համանախագահները պետք է միջնորդական ջանքերին մասնակցեն քաղաքական բարձր մակարդակով, որպեսզի անհրաժեշտ կշիռ ու արագության զգացում հաղորդեն դրանց. «Համանախագահները պետք է ճնշում բանեցնեն կողմերի վրա զիջումների հասնելու համար: Մասնավորապես, Հայաստանը պետք է վերադարձնի ադրբեջանական տարածքները, իսկ Ադրբեջանը ԼՂ-ին շնորհի ուժեղ, միջազգայնորեն աջակցություն վայելող անվտանգության միջանկյալ կարգավիճակ»:
Զեկույցի հեղինակները կարծում են, որ ԵՄ-ն և հատկապես ԵԱՀԿ-ում ներկայումս նախագահող Գերմանիան պետք է քաղաքական մեծ աջակցություն ցուցաբերեն Մինսկի խմբին, այդ թվում նաև Երևանի ու Բաքվի հետ երկկողմ հարաբերությունների միջոցով:
Զեկույցի հեղինակները Հայաստանի և Ադրբեջանի իշխանություններին խորհուրդ են տվել օգտվել ապրիլյան մարտերից հետո Ղարաբաղյան հիմնախնդրի վրա միջազգային հանրության մեծացած ուշադրությունից և աջակցել բանակցային գործընթացին, մեծապես պահպանել հրադադարի ռեժիմը, զերծ մնալ ռազմական հռետորաբանությունից, քայլեր ձեռնարկել երկխոսություն ապահովելու ուղղությամբ։
