Այսօր ԱԺ-ում ընդունվեց Ընտրական օրենսգրքում փոփոխություններ և լրացումներ կատարելու մասին նախագիծը: Մինչ նախագծի ընդունումն երկարատև բանակցությունների փուլ էր ընթանում ընդդիմության, քաղհասարակության և իշխանության ներկայացուցիչների միջև, ինչից հետո ստորագրվեց փաստաթուղթ: Վերջին օրերին իշխանությունները նշեցին, որ եթե ֆինանսավորում չլինի, ապա ձեռքբերված պայմանավորվածությունները կչեղարկվեն, և փոփոխությունները, որ միտված են ժողովրդավարական ընտրություններ անցկացնելուն, չեն իրականացվի: «Առաջին լրատվական»- ի հետ զրույցում անդրադառնալով այս զարգացումներին՝ իրավապաշտպան Վարդան Հարությունյանը նշեց, որ այս գործընթացը կատակերգություն է հիշեցնում: «Արդար, ազատ և թափանցիկ ընտրություններ անցկացելու պարտավորությունները դրված են իշխանությունների վրա, և դրա համար ոչ մի դրամ, ոչ մի լումա պետք չէ, դրա համար պետք է ընդամենը քաղաքական կամք»,-ընդգծեց Վ. Հարությունյանը:
Վ. Հարությունյանի դիտարկմամբ՝ եթե իշխանությունը կունենա քաղաքական կամք, կամայական ԸՕ-ով կկարողանա անցկացնել ազատ և արդար ընտրություններ, որի արդյունքում իշխանության կգան այն ուժերը, որոնք կստանան ժողովրդի մեծամասնության քվեն:
«Իշխանությունն իրեն դրել է այսպիսի վիճակի մեջ. մենք ի վիճակի չենք կամ չենք ցանկանում անցկացնել արդար ընտրություններ, և դուք՝ ընդդիմությո՛ւն, պարտավոր եք մեզ պարտադրել՝ ունենալ փոփոխված օրենք, որպեսզի մենք օրենքով ստիպված լինենք անցկացնել արդար ընտրություններ: Իշխանությունն ասում է՝ փոփոխությունների համար փող է պետք, դուք գտեք այդ փողը, մենք չունենք, պարտավոր չենք մեր տնից բերել, իսկ բյուջեում չկա»:
Վ. Հարությունյանի կարծիքով՝ լավագույն տարբերակը և՛ ընդդիմության, և՛ քաղաքացիական հասարակության, և՛ եվրոպական շահագրգիռ կառույցների համար պետք է լիներ այն, որ ստիպեին իշխանություններին՝ անցկացնել ազատ և արդար ընտրություններ, հակառակ դեպքում պետք չէր սեղմել նրանց ձեռքը, այլ պետք էր նրանց հայտարարել իզգոյ:
Իրավապաշտպանի խոսքով՝ նույնիսկ օրենքի ընդունման դեպքում ոչ ոք չի կարող ասել, որ իշխանությունները չեն խախտի օրենքը:
Մանրամասները՝ տեսանյութում: