Արթիկում աղետի 5-րդ օրն է։ Վարարած Ղարանղու գետի հետևանքով հունից դուրս եկած սելավատարը նոր խնդիրներ է բերել: Խնդիրների դեմ տուժած արթիկցիները մեն-մենակ են։ Քաղաք լցված հսկայական քարերը, ջրաբերուկները, սելավատարի հունը փոխել են։ Ջրի նոր ճամփան տների ճեղքված պատերն են։
Արթիկում փրկարարներ, բայց ոչ փրկություն, տեսել են վարչապետի այցելության օրը։ Տուն ու նկուղ լցված ջուրը դատարկում են սեփական ուժերով՝ կրելով։
70-ամյա Սարգիս պապը թոռներին ու տիկնոջը հարազատների տուն է ուղարկել։ Տան թաց ու դատարկ պատերի մեջ մենակ է։ Քնելու համար էլ սեփական տան ամենաչոր կետն է ընտրել՝ կտուրը։
Արթիկում սակայն սարսափում են ոչ այնքան փլվող տներից, որքան սպասվող համաճարակից։ Փլատակների տակ մնացած կենդանիներն սկսել են հոտել, գարշահոտություն տարածել։
Արթիկն ավելի քան երբևէ օգնության կարիք ունի։ Բնակիչները վսհատեցնում են՝ տեխնիկայի գործը ձեռքով շարունակելն այլևս անհնար է, բայց ճարահատ են. օգնությունը դեռևս խոստումների տեսքով է։
Պատկերն անմխիթար է նաև քաղաքի մյուս ծայրամասում։ Բմբուլենց կոչվող սելավատարն այստեղ ոչ պակաս ավերածություն է արել:
Արթիկի քաղաքապետ Արսեն Աբրահամյանը նշում է, որ քաղաքի կրած վնասի նախնական հաշվարկն արել են, բայց, ասում է՝ բնակիչներին անաչառ օգնություն ցույց տալու համար փորձագետները դեռ անելիք ունեն։
Քաղաքը նախկին տեսքին ու կյանքին բերելու համար պետք է ոչ միայն ժամանակ, այլև աջակցություն՝ գործի տեսքով: Սելավատարը նախկին հուն բերելն Արթիկի համար դեռ անհաղթահարելի խնդիր է։
Մանրամասները՝ տեսանյութում: