ԱԺ-ն այսօրվա արտահերթ նիստում շարունակում է քննարկել «ՀՀ և ՌԴ միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
ՀԱԿ խմբակցության անդամ Հրանտ Բագրատյանը նախ նշեց, որ իր համար մտահոգիչ կետեր կան համաձայնագրում. «ՌԴ-ի՝ ստրատեգիական դաշնակցի մասով համաձայն եմ, սակայն Թուրքիան մեր ստրատեգիական թշնամիներն են, և թուրքերն էլ մեզ են համարում ստրատեգիական թշնամի, մենք ռուսներին համարում ենք ստարտեգիական դաշնակից, իսկ նրանք այդ մասին չգիտեն: Ռուսների արածներն հակասական են մեր նկատմամբ: Թույլ տվեք հիշեցնել, որ չորս անգամ Կարսը գրավվել ու հետ է տրվել, Վանի ապստամբությունը հաղթեց, բայց երբ որ ռուսական բանակը եկավ, հետ քաշվեց, Վան չկար… Ես այստեղ չեմ եկել որպես հակառուս հանդես գալու, բայց ես տեսնում եմ, որ այստեղ մենք անընդհատ գովում ենք: Մենք գնում ենք 2017-ի ընտրություններին քաղաքական հայացքներո՞վ, թե՞ ելնելով նրանից՝ ով է մոտ Ռուսաստանին, ով մոտ չէ: Ես Հայաստանին եմ մոտ, և ընդհանրապես թքած ունեմ՝ ով ինչ է մտածում: Ձեզանից պակաս կապեր չեմ ունեցել Ռուսաստանում, բայց ես երբեք ինձ թույլ չեմ տվել քծնել»:
«Պարոն Բագրատյան, եթե այստեղ քծնողներ կան, անուններ տվեք: Ընդմիջմանը դրա մասին կխոսենք»,- բարկացած արձագանքեց ԱԺ փոխխոսնակ Էդուարդ Շարմազանովը:
«Պարոն Շարմազանով, ես չասացի, որ քծնողներ կան, ընդամենն ասացի, որ ես չեմ եկել այստեղ քծնելու համար, ես շատ հանգիստ ելույթ եմ ունենում»,- պարզաբանեց Հրանտ Բագրատյանն ու շարունակեց. «ՌԴ հետ մեր հարաբերություններին ես դեմ չեմ, սակայն դրանք պետք է լինեն արժանապատիվ: Ռուսների հետ մեր հարաբերությունները միշտ հակասական են եղել՝ նրանք և՛ փրկել են մեզ, և՛ քաշել»:
Մանրամասները՝ տեսանյութում: