Նալբանդյան 106/1 հասցեում իրականացվող բազմահարկ շենքի շինարարությունը շարունակվում է օրենքի խախատումներով և անտեսվում է Նալբանդյան, Թումանյան, Սայաթ-Նովա, Ավագ Պետրոսյան փողոցների բնակիչների քաղաքային իշխանությունների և կառուցապատողի հետ 4 տարի առաջ ձեռքբերված պայմանավորվածությունը։ Այս մասին ահազանգել էր «Մեր քաղաքը» նախաձեռնությունը։ Ավելին, կառավարությունն արդեն կատարված ապօրինության հիման վրա խմբագրել է գերակա շահի նախկին որոշումը՝ փոխարինելով «մինչև 7 վերգետնյա և նահանջած մանսարդային» բառերը «9 վերգետնյա հարկով և մեկ ետնահանջ հարկով» բառերով։
Ավագ Պետրոսյան փողոցի բնակիչ Լևոն Չուքասզյանը ընդգծում, որ երբ ցանկանում են օրենքն իրենց են հարմարեցնում՝ ոտնահարելով բնակիչների իրավունքները։
Երևանի ավագանու անդամ Արթուր Գասպարյանը նշում է՝ բազմահարկ, բազմաֆունկցիոնալ շենքը քաղաքաշինական, ճարտարապետական, բնապահպանական, կոմունիկացիոն նորմերի խախտումներով է կառուցվում։
Կառուցապատողը «Ավագ Շին» ընկերությունն է, բայց թե՛ բնակիչների կողմից և թե՛ մամուլում պարբերաբար շրջանառվել է, որ բազմաֆունկցիոնալ շենքում մեծ մասնաբաժին ունի վարչապետ Հովիկ Աբրահամյանը։ Արթուր Գասպարյանը նկատում է՝ ասվածը հստակ ապացուցել հնարավոր չէ, պաշտոնյաներն իրենց ունեցածը այլ անձնաց անունով են ձևակարեպում, բայց ակնհայտ է, որ այս շենքը առանց բարձր հովանու ուղղակի չէր կառուցվի։
Լևոն Չուքասզյանն էլ մանրամասնում է՝ իրեն չի հետաքրքրում, թե շենքի սեփականտերն ով է։ Ըստ նրա՝ պիտի մյուս բնակիչներն էլ այդպես մտածեն, անտեսեն վախի գործոնը և պայքարեն, քանի որ միայն Նալբանդյան 106/1 -ի շինարարությունով չեն սահամանափակվում ապօրինությունները։ «Եկել են տարբեր վայրերից, չեն սիրում այս քաղաքը, ավերում են»,- նշեց Չուքասզյանը:
Նա նաև ընդգծեց, որ իրենց կողմից բարձրացրած խնդիրն այլևս լուծում չի ստանա, պետք է պայաքարել իշխանափոխության համար՝ միայն իշխանափոխությունը կարող է հանգեցնել քաղաքացու համար կարևորագույն խնդիրների լուծմանը։
Մանրամասները՝ տեսանյութում:
