Հայաստանում ամենաազդեցիկ քաղաքական ուժը շարունակում է մնալ Հայաստանի Հանրապետական կուսակցությունը: Ազգային ժողովում լրագրողների հետ զրույցում այս մասին ասաց ՀՀԿ խոսնակ Էդուարդ Շարմազանովը՝ մեկնաբանելով Reuters գործակալությանը ՀՀ Նախագահ Սերժ Սարգսյանի հարցազրույցը, որում նախագահը հայտարարել է, որ ՀՀԿ-ն հաղթելու է առաջիկա խորհրդարանական ընտրություններում, իսկ եթե չհաղթի, ինքը քաղաքականության մեջ անելիք չունի: «Հայաստանի ամենաազդեցիկ քաղաքական ուժի ղեկավարը պետք է ունենա իր կարծիքը: Պարոն նախագահն արտահայտել է իր կարծիքը, և այն օբյեկտիվ է, տրամաբանական ու ընդունելի: Այսօր Հայաստանի ամենաազդեցիկ քաղաքական ուժը Հանրապետական կուսակցությունն է: Կուսակցության վարկանիշը բարձր բղավելով չէ, առաջիկայում Գյումրիում և Վանաձորում ընտրություններ են, տեսնենք, թե քանի ձայն կհավաքեն այն քաղաքական ուժերը, որոնք բարձր խոսում են»,- նշեց Շարմազանովը:
Դիտարկմանը, թե Հայաստանում միակուսակցական համակարգ է ձևավորվում, Շարմազանովը նշեց, որ միակուսակցական համակարգի մասին խոսելը ծիծաղելի է: «Մենք բաց ենք մրցակցել բոլոր քաղաքական ուժերի հետ: Միակուսակցական համակարգի մասին խոսելը ծիծաղելի է, բոլորը իրավունք ունեն մասնակցելու ընտրություններին: Մենք բոլորին հրավիրում ենք բաց, ազատ, թափանցիկ մրցակցության: Այդքան բարձր բացականչելու փոխարեն լավ կլինի մասնակցել ընտրություններին: Մենք այդ իմաստով բաց ենք, մեր հանրությունը կորոշի»,– նշեց ԱԺ փոխխոսնակը:
Հարցին՝ ո՞ր պաշտոնում է հետագայում տեսնում Սերժ Սարգսյանին, Շարմազանովը պատասխանեց. «Հայաստանի նախագահ Սերժ Սարգսյանը մինչև 2018թ. իր ամբողջ լիազորություններով շարունակելու է պաշտոնավարել, դրա համար հիմա կոռեկտ չէ խոսել նման բաների մասին: Օրը կգա բարին հետը, դանդաղ շտապեք»:
Լրագրողներից մեկի հարցին՝ ՀՀԿ-ն անհա՞ղթ է, ԱԺ փոխնախագահն ասաց. «Անհաղթ է միայն Աստված և հայ ժողովուրդը»:
Անդրադառնալով հարցին՝ որտեղի՞ց է այդքան վստահությունը, որ ՀՀԿ-ն հաղթելու է առաջիկա ընտրություններում, Շարմազանովն ասաց, որ կան կուսակցություններ, որոնք ոտքից գլուխ 7 հոգի են, 9.5 ձայն ունեն, սակայն այնպես են խոսում, որ թվում է` եթե առաջիկայում ընտրություններ լինեն, նրանք 80 տոկոս ձայն կհավաքեն: «Վստահությունը այսօրվա իրավիճակից է: Վաղը Գյումրիում և Վանաձորում ընտրություններ կլինեն, կտեսնեք»,-եզրափակեց Շարմազանովը: