ԱԺ այսօրվա արտահերթ նիստին իր ելույթում ԲՀԿ խմբակցության ղեկավար Նաիրա Զոհրաբյանն իր ելույթում անդրադարձավ որոշ քաղաքական ուժերի, որոնց նա անվանեց աղանդավորական սեկտաներ. նրա խոսքով՝ նրանք աղճատում են, կամ փորձում են այլասերել քաղաքական դաշտը: Նրանք անում են ամեն ինչ, որ այս համաձայնությունը չկայանա, քանի որ նրանց բացարձակ պետք չեն ազատ, թափանցիկ ընտրությունները, նրանց սկզբունքն է՝ ինչքան վատ, այնքան լավ, նրանց ձևակերպումն է՝ ամեն ինչ փլվի, միայն այս փլատակների տակ տեսնեն նաև իշխանության ոտքերը:
«Նրանց պետք է պատերազմ, անուններ չեմ հնչեցնում, սակայն կան քաղաքական ուժեր, որոնք պետք է, որ շփման գծում լայնամասշտաբ գործողություներ սկսվեն, էլի երեխաներ զոհվեն սահմանին, միայն թե դրանից դրանից խարխլվի մեր երկրի կայունությունը, որ իրենք իրենց աղանդավորական սեկտայում իրենց լավ զգան, կարողանան ասել՝ տեսաք՝ մենք ճիշտ էինք, այստեղ ոչ մի պոզիտիվ բան հնարավոր չէ, բոլոր ճակատներում են տապալել»,- նշեց ԲՀԿ խմբակցության ղեկավարը:
Նաիրա Զոհրաբյանը շնորհակալություն հայտնեց բոլոր քաղաքական ուժերին, և հատկապես ՀԱԿ-ին. «ՀԱԿ-ի համառ ջանքերի շնորհիվ եղավ, որ իշխանությունները, որոնք ոչ մի զիջման չէին գնում, եկան համաձայնության: Վա՞տ է, որ 4 սկզբունքային հարցերի շուրջ կայուն մեխանիզմներ ձևավորեցինք… Նրանք ովքեր ասում են վատ է, նրանք ուզում են, որ ընտրությունները էլի կեղծվեն: Եթե դեմ ենք այս համաձայնագրին, այլ ճանապարհը արյունահեղությունն է, որին մենք դեմ ենք: Նրանք, որոնք դեմ են այս դժվարությամբ ձեռք բերված համաձայնությանը, ուրեմն այդ քաղաքական ուժերի կոդերը, սեկտաների մեսիջները նորմալ ընտրությունները չեն, այլ՝ ինչքան վատ, այնքան լավ կարգախոսի իրականացումը: Բոլոր այն ուժերը, որոնք սեկտա չեն, բոլորս միասին նրանց պետք է կանխենք: Այո, սեկտայի բնազդով չպետք է առաջնորդվել, այլ քաղաքական մոտեցումներով:
ԲՀԿ-ն կողմ է ու տեր է կանգնում համաձայնագրի տակ դրած իր ստորագրությանը»: