ԱԺ արտահերթ նիստին այսօր նոր Ընտրական օրենսգրքի փոփոխությունների հարցի քննարկմանը ՀՀԿ խմբակցության անդամ Լևոն Մարտիրոսյանը մինչ նախագծին անդրադառնալը, խոսեց Հռոմի պապի այցի կարևորության մասին, ապա՝ Մեծ Բրիտանիայի՝ ԵՄ-ից դուրս գալու մասին.
ԸՕ վերաբերյալ նախօրեի քննարկումներից Լ. Մարտիրոսյանը տարօրինակ տպավորություն է ստացել. «Բան էլ չէր մնացել քննարկելու՝ ընդդիմության բոլոր խնդրանքներն ու պահանջները արդեն իսկ ընդունվել են, արդեն պիտի այստեղ ջան ասեինք, ջան լսեինք, սակայն պարզվեց դեռ դժգոհություններ կան: Այստեղ թող կոպիտ չհնչի, սակայն մազոխիզմի հոտ է գալիս, իշխանությունն էլ սադիստական վերաբերմունք է ցուցաբերում: Բոլորն էլ հասկանում են, որ խնդիրը
ԸՕ տեքստի մեջ չէ: Բոլորս էլ ընդունում ենք, որ ընտրական գործընթացների նկատմամբ հասարակության վստահությունը չի ավելանալու՝ անկախ նրանից, թե ինչ է գրված: Վստահությունը բարձրանալու է մեկ դեպքում, երբ իշխանության կգա ընդդիմադիր մի ուժ: Դա տեղի կունենա մի դեպքում, երբ ընդդիմությունը ունենա հավասար կամ ավելի ռեսուրսներ, քան իշխանությունը: Եթե ընդդիմությունը հիմա չունի այդքան ռեսուրս, իշխանությունը մեղավոր չէ:
ԸՕ-ում աստվածաշնչային ճշմարտություններ էլ եթե գրենք, միևնույն է՝ ոչինչ չի փոխվելու: Տեսախցիկները, որ ասում եք տեղադրենք ընտրատեղամասերում, քիչ է մնում տեսալուսանկարահանող, ձայնագրող սարքեր տեղադրեք նաև հանձնաժողովի անդամների ներքնազգեստներում: Ընտրատեղամասերում վաղուց ոչինչ տեղի չի ունենում, ամեն ինչ մարդկանց ուղեղներում է տեղի ունենում»,- նշեց Լ. Մարտիրոսյանը:
Նա նաև հավելեց. «Այսպիսի կատարյալ օրենսգիրք որևէ մի երկրում ես չեմ կարծում, որ կարող է լինել: Ինչ վերաբերում է այն գումարին, որ պետք է իրականացվեն ԸՕ նոր փոփոխությունները, ապա կարծում եմ՝ դա այնպիսի գումար չէ, որ խնդրո առարկա դառնա՝ 14-16 մլն դոլար: Թող սա հումոր չլինի, ես հենց նոր կարդում էի, որ մեր տաղանդավոր ֆուտբոլիստ Հենրիխ Մխիթարյանի համար Մանչեսթեր Յունայթեդը 26 մլն ֆունտ ստեռլինգ է առաջարկել է: Կարծում եմ՝ կարելի է նրա գործակալին դիմել ու մի կետ այնտեղ գրել, որ Հենրիխ Մխիթարյանի հայրենիքի ժողովրդավարության հետագա զարգացման համար մի որոշ գումար հատկացնեն»:
Մանրամասները՝ տեսանյութում: