«Կարող ենք ասել, որ այս պահին քննարկվում է ՀՀ ներքին թշնամու կողմից ՀՀ քաղաքացիների նկատմամբ հարձակման օրը և ձևերը. այս մասին իր ելույթում կառավարության հրավիրած ԱԺ արտահերթ նիստին այսօր նոր Ընտրական օրենսգրքի նախագծի քննարկման ժամանակ ասաց «Ժառանգության» պատգամավոր Զարուհի Փոստանջյանը:
«Այս նախագիծն այլ կերպ անվանել չենք կարող: Դա նախատեսվում է իրականացնել 2017թ. գարնանը: Այս մտահղացումը տապալելու համար մենք ինքներս պետք է լինենք նախահարձակ, գնանք և վերցնենք մեզ պատկանող իշխանությունը, որը այս պահին գտնվում է ՀՀԿ-ի ձեռքին: Սերժ Սարգսյանը երեկ հայտարարեց, որ ոչ միայն 2017թ. է մնալու, այլև չի պատրաստվում դրանից հետո էլ հեռանալ»:
Զարուհի Փոստանջյանի խոսքով՝ երեկ Կառավարության աշխատակազմի ղեկավար-նախարար Դավիթ Հարությունյանը մատնեց իրենց ճակատում եղած խուճապը. «Եթե մարդը չի ունենում քաղաքական հիմնավորումներ՝ պատասխանելու հարցադրումներին, ապա հղում է կատարում մարդկանց սեռական պատկանելությանը, շեշտելով, որ ես կին եմ, դրա համար չի պատասխանում: Ես այստեղ ո՛չ որպես կին եմ հանդես գալիս, ո՛չ էլ որպես տղամարդ, այլ որպես քաղաքական գործիչ եմ հանդես գալիս, որը պատասխաններ է ակնկալում մի իշխանությունից, որը հանձնել է հայրենի բնօրրանի տարածքները, որոնք իշխանության ձևակերպմամբ՝ ամայի տարածքներ են:
Մեզ ազգային իշխանություններ են պետք, որ չեն գնում Մոսկվա ու ձեռք բերում պայմանավորվածություններ՝ անգամ մեր օդային տարածքի հանձնման մասին…
Փաստորեն, մեր ազատագրումը ՌԴ-ից նույնպես կանխվեց: Ուզում եմ հիշեցնել՝ եթե հանդես ես գալիս պարտվողի, հող հանձնողի դիրքերից, ապա հաջորդ հարձակումը անխուսափելի է, հաջորդ աղետն անխուսափելի է: Մեր միակ ելքը՝ խփել այս հանցավոր ռեժիմին ու վերացնել, այլ միջոց մեզ չի մնացել: Ինձ հաճախ հարցնում են՝ մի տղամարդ չկա՞, որ խփի սրանց…»:
Մանրամասները՝ տեսանյութում: