Երեկ Facebook սոցիալական ցանցի ղեկավարությունը խոստովանել է, որ Burson-Marsteller PR ընկերությանը գումարներ է հատկացրել, որպեսզի վնաս հասցնի Google-ի վարկին: Այս մասին այսօր գրում է The Telegraph-ը:
Ընդ որում, Facebook-ի այս քայլի մերկացման գործում առանցքային դեր է խաղացել ԱՄՆ-ում հայտնի հայազգի բլոգեր Քրիստոֆեր Սողոյանը: Պարզվել է, որ Burson-Marsteller ընկերությունը դիմել է բլոգերին` խնդրելով սխալ տեղեկություններ տարածել Google-ի մասին` ասելով, թե վերջինս վնասում է իր օգտատերերի տեղեկությունների անվտանգությանը: Դրա դիմաց Սողոյանին խոստացել են հրապարակել նրա հոդվածները այնպիսի հայտնի թերթերում, ինչպիսիք են The Huffington Post-ը և The Washington Post-ը:
Սակայն Սողոյանը հրաժարվել է գնալ այս քայլին` հրապարակելով PR ընկերության՝ իրեն ուղղված նամակը, ինչը միանգամից մեծ աղմուկ է բարձրացրել մամուլում: Այնուհետև The Daily Beast թերթը հայտնաբերել է Facebook-ի և Burson-Marsteller-ի կապը հաստատող ապացույցներ, որից հետո էլ սոցիալական ցանցի ղեկավարությունը խոստովանել է, որ գնացել է նման քայլի: