Հունիսի 18-19-ը Հայաստանի ամերիկյան համալսարանում անցկացվում է 8-րդ «ԲարՔեմփ Երևան 2016» չկոնֆերանսը:
«ԲարՔեմփ» են անվանում տեղեկատվական տեխնոլոգիաների, ինտերնետի և նոր մեդիաների թեմաներով չկոնֆերանսները, որոնք անցնում են ոչ ֆորմալ մթնոլորտում, ինչն ապահովում է բաց քննարկումներ և մտքերի ազատ փոխանակում։
Տեղեկատվական անվտանգության փորձագետ Սամվել Մարտիրոսյանի խոսքով՝ «ԲարՔեմփ»-ը մարդկանց և գաղափարների հանդիպման կետ է: «Մարդկության և ապագայի նկատմամբ հույսը կորցրածները «Բարքեմփ»-ում կարող են լիցքավորվել»,- ընդգծում է փորձագետը:
«ԲարՔեմփ»-ը media.am կայքի խմբագիր Գեղամ Վարդանյանի խոսքով՝ երկու կարևոր հատկանիշ ունի. կամավոր սկզբունքով կազմակերպվող և կրթական միջոցառում է: Մարդիկ երկու օր՝ իրենց հանգստյան օրերը տրամադրում են գիտելիքները միմյանց փոխանցելուն:
Նրա հավաստմամբ՝ ավելի շատ երիտասարդներն են մասնակցում: «Այստեղ հանդիպում են տեխնոլոգիաները, բովանդակությունը և մարդիկ, ովքեր հետաքրքրված են դրանցով, այստեղ կարող են հետաքրքիր ծրագրեր ծնվել:
«ԲարՔեմփ»-ին Գեղամ Վարդանյանը ներկայացրել է, թե ինչպես կարող են սպառողները խուսափել մեդիամանիպուլյացիաներից:
Մանրամասները՝ տեսանյութում: