Այսօր անապատացման և երաշտի դեմ պայքարի համաշխարհային օրն է: ՄԱԿ-ի այս կոնվենցիան ընդունվել է 1994 թ. հունիսի 17-ին: Նպատակն է անապատացման և հողերի ոչնչացման դեմ պայքարի և երաշտի հետևանքները նվազեցնելու գործընթացում միավորել պետական ու հասարակական կազմակերպությունների ջանքերը: Հայաստանն Անապատացման դեմ ՄԱԿ-ի կոնվենցիայի լիիրավ անդամ է:
Կոնվենցիայի լիիրավ անդամ լինելը չի կանգնեցնում քաղաքաշինությամբ զբաղվողներին Երևանն անապատցնելու համար, վստահ է բնապահպան Կարինե Դանիելյանը:
Օղակաձև այգին կորցրել է իր նշանակությունը: Կանաչապատ տարածքները վաղուց ռեստորանապատ ու սրճարանապատ են, ցավով նշում է բնապահպանը:
Քաղաքի կենտրոնը նաև անապատացման կենտրոնն է, վառ օրինակն էլ Հյուսիսային պողոտան: Կարինե Դանիելյանն առաջարկում է քաղաքի այս հատվածն օգտագործել որպես կրթօջախ աշխարհի երիտասարդ ճարտարապետների համար:
Երևանի՝ տիեզերքից արված լուսանկարների համաձայն՝ մայրաքաղաքը կորցրել է կանաչի 60 տոկոսը, մինչդեռ պաշտոնական տվյալները ճիշտ հակառակն են փաստում: