Երեկվանից Թուրքիան պաշտոնապես ստանձնեց Եվրոպայի խորհրդի նախարարների կոմիտեի նախագահությունը և մինչև հաջորդ տարվա մայիս կլինի կոմիտեի նախագահողը:
Մակեդոնիայի արտգործնախարար Անտոնիո Միլոշոսկին Ստրասբուրգում նախարարությունը փոխանցել է Թուրքիայի արտգործնախարար Ահմեդ Դավութօղլուին:
Hurriyet Daily News-ը, հիշեցնելով, որ ԵԽԽՎ-ն էլ ղեկավարում է թուրք խորհրդարանական Մևլութ Չավուշօղլուն, գրում է, որ հայտնի երկու քաղաքական գործիչները միջազգային ամենահին կառույցներից մեկի գագաթներում են:
Եվրոպայի խորհրդում Թուրքիայի մշտական ներկայացուցիչ Դարիել Բաթիբեյը լրագրողներին ասել է, թե իրենց երկրից սպասումները մեծ են, Թուրքիան դիտվում է իբրև կարևոր դերակատարություն ունեցող երկիր, և Եվրոպայի խորհրդի նախագահությունը նշանակալից է: §Մենք պատրաստ ենք լավագույնը անել», – հավաստիացրել է նա:
Ընդունելով նախագահությունը` Թուրքիայի արտգործնախարար Ահմեդ Դավութօղլուն Ստրասբուրգում կայացած նիստում ներկայացրել է Թուրքիայի համար առաջնահերթ խնդիրները, թե ինչի վրա ավելի ուշադրություն կդարձնի Թուրքիան առաջիկա վեց ամիսների ընթացքում:
Նա ասել է, որ Թուրքիան կշարունակի բարեփոխումները Եվրոպայի խորհրդում։ Իրենց համար առաջնահերթություններից է Եվրախորհրդի ազդեցության ուժեղացումը: Դավութօղլուի խոսքերով` Թուրքիան ուշադրություն կդարձնի եվրոպական կառույցի անկախ ինստիտուտների վրա, ինչպիսիք են Եվրախորհրդի մարդու իրավունքների հարցերով հանձնախումբը, ռասիզմի և անհանդուրժողականության դեմ կոմիտեն, խոշտանգումների դեմ կոմիտեն: Թուրքիայի ԱԳ նախարարը ասել է, որ ուշադրության տակ կլինեն նաև Մարդու իրավունքների եվրոպական դատարանում անցկացվող բարեփոխումները:
Այսօր Դավութօղլուն և Չավուշօղլուն միասին մասնակցելու են եվրոպական կառույցի ղեկավար կոմիտեի նիստին, որի ընթացքում Թուրքիայի արտգործնախարարը Եվրոպայի խորհրդի Խորհրդարանական վեհաժողովի պատգամավորներին ներկայացնելու է Թուրքիայի առաջիկա քայլերը:
