Ամերիկյան և հնդկական կինոարդյունաբերական հսկաները` Հոլիվուդն ու Բոլիվուդը, որոնք արտադրում են աշխարհում կոմերցիոն ֆիլմերի մեծամասնությունը, ստորագրել են համաձայնագիր համագործակցության մասին: Համաձայն դրա` երկու ընկերությունները կխորացնեն կոմերցիոն և դիստրիբուցիոն կապերը, կգործակցեն հնդկական ֆիլմերը ԱՄՆ-ում նկարահանելու ուղղությամբ:
Լոս Անջելեսում կայացած ստորագրման արարողության ժամանակ հնդկական պատվիրակության ղեկավար Բոբի Բեդին նշել է, որ «Հնդկաստանը մշտապես հիացել է Հոլիվուդով», իսկ այս համաձայնագիրն իրենց էլ ավելի կմերձեցնի և կօգնի մտահղացումների ու փորձի փոխանակման առումով:
Իր հերթին, ամերիկյան պատվիրակության ղեկավար, Լոս Անջելեսի քաղաքապետ Անտոնիո Վիլլառայգոսան հիշեցրել է, որ նախորդ տարի իրենց քաղաքում յոթ հնդկական ֆիլմ է նկարահանվել, և հույս է հայտնել, որ դրանց թիվը հետագայում կմեծանա: