«Գաղափարակից լիբերալների ալյանս» կամ հակիրճ՝ ԳԱԼԱ կուսակցություն. Գյումրու ԳԱԼԱ հեռուստաընկերության մի քանի աշխատակիցներ համախմբվել են մեկ գաղափարի շուրջ և հիմնել կուսակցություն, որի առաջնային նպատակներից է Գյումրու Տեղական ինքնակառավարման մարմինների ընտրություններին մասնակցությունը:
ԳԱԼԱ հեռուստաընկերության աշխատակազմը 11 տարի շարունակ պայքարել է ընտրական գործընթացում կեղծիքների ու խախտումների դեմ, սակայն միայն լրատվական գործիքակազմով ինչ-որ բան չի ստացվել: Այսպես է բացատրում լրագրողների մուտքը քաղաքականություն ԳԱԼԱ կուսակցության նախաձեռնող խմբի անդամ Քրիստինա Մկրտչյանը:
ԳԱԼԱ կուսակցության նախաձեռնող խմբի անդամ Արամ Խաչատրյանն էլ մանրամասնում է՝ կուսակցության, ինչպես և ԳԱԼԱ հեռուստաընկերության ֆինանսական խնդիրները լուծվում են ու կլուծվեն գաղափարակիցների շնորհիվ, սակայն այդ տեսակ խնդիրներ դեռևս չկան:
Եթե ԳԱԼԱ կուսակցությունը հաջողություն գրանցի ՏԻՄ ընտրություններում, ապա հաջորդ քայլը կլինի համապետական՝ 2017 թվականի խորհրդարանական ընտրություններին մասնակցելը:
Քաղաքագետ Գագիկ Համբարյանը հույս ունի, որ ԳԱԼԱ հեռուստաընկերության մի քանի աշխատակիցների նախաձեռնած համանուն կուսակցության գլխավոր նպատակներից է ոչ միայն առաջիկա ՏԻՄ ընտրություններին մասնակցելը, այլև իշխանության գալը:
«Գաղափարակից լիբերալների ալյանս» կուսակցության առաջին համագումարը տեղի կունենա հուլիսի 1-ին:
