Հայտնի են դարձել ԱՄՆ-ի և Սաուդյան Արաբիայի միջև կնքված համաձայնության մանրամասները, որոնք գաղտնի են պահվել 41 տարի: Տվյալ գործարքը նշանակալիորեն որոշել է 2 երկրների հարաբերությունների բնույթը, նշում է Bloomberg-ը:
1974 թվականին նավթային համաշխարհային ճգնաժամը ուժեղ հարվածել է ԱՄՆ տնտեսությանը: Բացի այդ, ՕՊԵԿ-ը ԱՄՆ-ի նկատմամբ էմբարգո է մտցրել Իսրայելին ռազմական օգնություն ցուցաբերելու համար: Այդ փաստերը հանգեցրել են արժեթղթերի շուկայի փլուզմանը և երկրում գնաճին:
Հենց այդ ժամանակ ԱՄՆ ֆինանսների նախարար Ուիլյամ Սայմոնը իր տեղակալի հետ ուղևորվում են Մերձավոր Արևելք և Եվրոպա: Պաշտոնապես այդ ուղևորությունը ներկայացվել է որպես սովորական շրջագայություն, սակայն իրականում նրանք նպատակ են ունեցել այցելելու Սաուդյան Արաբիա: Այցի նպատակն է եղել նավթի չեզոքացումը՝ որպես տնտեսական զենքի:
Սայմոնը մշակել է գործողությունների պլան, ըստ որի՝ ԱՄՆ-ը Սաուդյան Արաբիայից գնում է նավթ և նրան ռազմական օգնություն հատկացնում, իսկ ԱՄՆ գանձապետարանը դրա փոխարեն ստանում է սաուդյան միլիարդավոր նավթադոլարներ: Հաղորդվում է, որ Սաուդյան Արաբիայի թագավորը բանակցությունների ընթացքում պնդել է, որ Էր Ռիյադի կողմից գանձապետական պարտատոմսերի գնումը մնա գաղտնի:
Գործարքի գումարը՝ 117 միլիարդ դոլարի չափով, հայտնի է դարձել միայն 2016 թվականի մայիսին:
