Ռուսական RIA Novosti լրատվական գործակալության փոխանցմամբ՝ Թուրքիայի արտգործնախարար Մևլյութ Չավուշօղլուն հայտարարել է, որ Վաշինգտոնը չի կատարում իր պարտականություններն Անկարայի առջև՝ կապված Սիրիայի հետ սահմանին ամերիկյան HIMARS համազարկի կրակի ռեակտիվ համակարգեր տեղակայելու հետ:
Ավելի վաղ Չավուշօղլուն հայտարարել էր, որ Թուրքիան ԱՄՆ հետ պայմանավորվել է մայիսին Սիրիայի հետ սահմանին HIMARS համակարգեր տեղակայելու շուրջ՝ Սիրիայի հյուսիսում ԴԱԻՇ-ի դեմ արդյունավետ պայքարի համար:
Ներկայումս Սիրիայի հետ սահմանի մոտ տեղակայված թուրքական հրետանու առավելագույն հեռահարությունը 40 կիլոմետր է, իսկ HIMARS-ինը՝ 90 կիլոմետր:
Չավուշօղլուն ներկայումս հայտարարել է. «Այժմ հայտարարվում է 2016 թվականի օգոստոսին այդ համակարգերը տեղակայելու ժամկետի մասին: Դժբախտաբար, ԱՄՆ-ը չի կատարում խոստումները:
Մենք ամբողջովին պատրաստ ենք ընդունելու համալիրները, սակայն Վաշինգտոնը դրա փոխարեն Սիրիա է ուղարկում ահաբեկիչների տարբերանշանով հանդերձանքով զինծառայողներ: Նման պահվածքը որևէ ընդհանուր բան չունի դաշնակցային հարաբերությունների հետ: Դրանք երկակի ստանդարտներ են»: