«Առաջին անգամ է կուսակցության համաժողովը անցկացվում հայրենիքում, հիմք է դրվում ԵՌԱԿ-ի գործունեությունը, այս պատգամավորական ժողովի նախօրյակին տեղի ունեցավ խորհրդակցական հանդիպում, որի ընթացքում աշխարհի չորս ծագերից առաջարկներ ներկայացվեցին և քննարկվեցին, վերածվեցին բանաձևերի, որոնք պետք է քննարկվեն համաժողովի ընթացքում»: Այս մասին «Առաջին լրատվական»- ի հետ զրույցում տեղեկացրեց ՌԱԿ 27-րդ ընդհանուր պատգամավորական ժողովին մասնակցելու համար Հայաստան ժամանած ՌԱԿ Արևմտյան Ամերիկայի ատենապետ Րաֆֆի Բալյանը:
Անդրադառնալով մեր դիտարկմանը, որ չնայած սփյուքում ունեցած հսկայական ներուժին, այնուամենայնիվ, ՌԱԿ-ը չի կարողանում Հայաստանում քաղաքական լուրջ ազդեցություն ունենալ, Ր. Բալյանը պատասխանեց. «Մենք մեր քաղաքական ներդրումն ենք ունենում այն երկրներում, որտեղ գործում ենք, և կարծում ենք, որ այդպիսով ավելի օգտակար կարող ենք լինել և զորակցել մեր հայրենիքին՝ մեր բոլոր քաղաքական լծակներն օգտագործելով ի նպաստ մեր հայրենիքի բարօրության»:
«Սփյուռքի համար գլխավոր մտահոգությունը այսօր մեր հայրենիքի ՝ Հայաստանի և Արցախի անվտանգությունն է,- նշեց Ր. Բալյանը,- պետք է մենք միակամ և միավորված պաշտպանենք մեր ունեցածը, որպես մեկ մարմին՝ մեկ ազգ, որպեսզի կարողանանք դիմագրավել բոլոր մարտահրավերները»:
Նրա խոսքով՝ պետք է հետայսու մենք մեր հույսը մեզ վրա դնենք՝ միևնույն ժամանակ մեր քաղաքական լծակներն օգտագործելով մեծ պետությունների հետ, որպեսզի կարողանանք ճիշտ նավարկել այս ճակատագրական լուրջ շրջանում:
ԱՆդրադառնալով հարցին, թե հայ համայնքն ում թեկնածությանն է նախապատվություն տալիս՝ Թրամփի, Քլինթոնի, թե Սանդերսի, Ր. Բալյանն նշեց, որ հայ համայնքը միակարծիք չէ. «Թրամփը մեզ այնքան էլ մեծ ոգևորություն չի ներշնչում, Քլինթոնն էլ հուսադրիչ չէ»:
Մանրամասները՝ տեսանյութում:
