Հունահռոմեական ոճի ՀՀ ազգային հավաքականը, գլխավոր մարզիչ, օլիմպիական չեմպիոն Լևոն Ջուլֆալակյանի ղեկավարությամբ՝ մայիսի 10-24-ը Ծաղկաձորում համատեղ ուսումնամարզական հավաք անցկացրեց օլիմպիական կրկնակի չեմպիոն Արմեն Նազարյանի գլխավորությամբ ելույթ ունեցող Բուլղարիայի, ինչպես նաև Վենեսուելայի և Ալժիրի ընտրանիների հետ:
Դա փաստորեն մեր ըմբիշների նախաօլիմպիական առաջին ուսումնամարզական հավաքն էր, որը մարզչի խոսքով՝ ուղղված էր ըմբիշների ֆիզիկական և ֆունցիոնալ վիճակը բարելավելուն: Մայիսի 25-ին ՌԻՈ-2016 թ օլիմպիական ուղեգրեր նվաճած այս մարզաձևի մեր հրաշալի քառյակը՝ Միհրան Հարությունյանը (66 կգ), Արսեն Ջուլֆալակյանը (75 կգ), Մաքսիմ Մանուկյանը (85 կգ) և Արթուր Ալեքսանյանը մեկնել են Իտալիա: Այստեղ նրանք Սասսարի քաղաքում մասնակցելու են ուժեղ կազմ հավաքող ավանդական միջագային ներկայացուցչական՝ Մաթեո Պելիցոնեի 35-րդ հուշամրցաշարին (Milone Trophy Matteo Pellicone Memorial), որն ընթանալու է միայն մեկ օրում ՝ մայիսի 28-ին:
Ըստ նախնական հայտերի, հուշամրցաշարին մասնակցելու հրավեր են ստացել 29 երկրի առաջատար ըմբիշներ: Ըստ մրցաշարի ժանակացույցի, ժամը 9:30-14:00 ընթանալու են բոլոր 8 քաշային կարգերի՝ 59, 66, 71, 75, 80, 85, 98 և 130 կգ նախնական և սփոփիչ փուլերի գոտեմարտերն, իսկ ժամը 17:00-20:30-ը կանցկացվեն եզրափակիչ փուլի մենամարտերը: Հուշամրցաշարի գոտեմարտերի ընթացքին ուղիղ հեռարաձակմամբ կարող եք հետևել հետևյալ հղումներով՝
Մրցագորգ A – https://www.youtube.com/watch?v=gIkQ_c8ADJw
Մրցագորգ B – https://www.youtube.com/watch?v=Cjjh6U2rSL4
Մրցագորգ C – https://www.youtube.com/watch?v=OeBD8r-dhbU
Հավելենք, որ 2014 թ ՀՀ պատվիրակները հուշամրցաշարի 33-րդ խաղարկությունից մրցանակների հարուստ ավարով են վերադարձել Իտալիայից: Առաջին տեղը գրավել էին Ռոման Ամոյանը, Արսեն Ջուլֆալակյանը, Արթուր Շահինյանը և Արթուր Ալեքսանյանը, իսկ Արամ Ջուլֆալակյանն ու Մաքսիմ Մանուկյան էլ արծաթե մեդալ էին նվաճել: