ՆԱՏՕ-ն պետք է մասնակցի ԴԱԻՇ-ի դեմ պատերազմին, այդ մասնակցության պարամետրերը կքննարկվեն դաշինքի Վարշավայում տեղի ունենալիք հուլիսյան վեհաժողովում, Spiegel-ին տված հարցազրույցում հայտնել է ԴԱԻՇ-ի դեմ պայքարում ԱՄՆ հատուկ ներկայացուցիչ Բրեթ Մաքգերկը:
«ՆԱՏՕ-ն պետք է շատ կարևոր դեր խաղա: Մի կողմից կարող է ընդլայնվել իրաքյան զինծառայողների պատրաստումը, որը մինչ այժմ կատարվում էր Հորդանանում: Բացի այդ՝ AWACS հետախույզ-ինքնաթիռները կարող են իրենց վրա կարևոր խնդիր վերցնել՝ օգնելով կոալիցիային: Ես հույս ունեմ, որ հուլիսի սկզբին ՆԱՏՕ-ի Վարշավայի վեհաժողովի ժամանակ մենք կոնկրետ նպատակներով որոշում կընդունենք»,- ասել է Մաքգերկը:
Նրա խոսքերով՝ ԱՄՆ-ն անցնում է ԴԱԻՇ-ի դեմ պայքարի նոր փուլի, ինչը նշանակում է հարձակողական գործողություններ միաժամանակ մի քանի ճակատներով, մասնավորապես՝ սիրիական Ռաքքայի և իրաքյան Էլ-Ֆալուջայի ուղղություններով:
«Իսլամիստները շատ թուլացած են։ Նրանց դրամական հոսքերը կրճատված են։ Հատուկ ծառայությունները չեզոքացրել են իսլամիստների ֆինանսական առաջնորդին, ինչպես նաև «Չեչենին», որը եղել է դաշտային գլխավոր հրամանատարներից մեկը»,- ասել է Մաքգերկը:
