Հյուսիսային Կորեայի իշխանությունները սպառնացել են անհապաղ կրակ բացել հարավկորեական նավերի ուղղությամբ, եթե դրանք հատեն երկու երկրների միջև վիճելի ծովային սահմանը «նույնիսկ 0,001 մմ-ով»: Այս մասին հայտնում է BBC-ի ռուսական ծառայությունը:
Նախօրեին Հարավային Կորեայի ռազմական նավերը նախազգուշական կրակ են բացել, երբ երկու նավ Հյուսիսային Կորեայից մտել են հարավկորեական ջրային տարածք:
Հյուսիսային Կորեայի բանակի գլխավոր շտաբի հայտարարության մեջ Հարավային Կորեայի գործողություններն անվանվել են «անպատասխանատու ռազմական պորվոկացիա» երկու երկրների հարաբերություններում լարվածությունը մեծացնելու նպատակով:
Փխենյանի հայտարարությամբ՝ հյուսիսկորեական նավերում զենք չի եղել, դրանք գտնվել են Հյուսիսային Կորեայի ջրային տարածքում, երբ նրանց ուղղությամբ առանց նախազգուշացման կրակ են բացել «մեծաթիվ զինված նավեր» Հարավային Կորեայից:
Իսկ Սեուլը պնդում է, որ հարավկորեական նավը նախ նախազգուշական ազդանշան է տվել, որից հետո 5 նախազգուշական համազարկ է տրվել, քանի որ Հյուսիսային Կորեայի նավն ու ձկնորսական նավը մտել են Հարավային Կորեայի ջրային տարածք: