Ադրբեջանը ցանկանում է Ղարաբաղի հակամարտության խաղաղ կարգավորում, հայտարարել է նախագահ Իլհամ Ալիևը Ադրբեջանի ազգային տոնի`Հանրապետության օրվա առթիվ կազմակերպված հանդիսավոր ընդունելության ժամանակ, հայտնում է RIA Novosti-ն:
«Մենք սպասում ենք արդեն ավելի քան 20 տարի: Միջնորդները մեզ միշտ ասում են. սպասեք, լուծեք խաղաղ ճանապարհով: Վերջին ժամանակ նրանք ավելի հաճախ են դա կրկնում: Ո՞վ է ուզում, որ լինի պատերազմ: Սակայն մենք ցանկանում ենք այդ հակամարտության կարգավորում»,- մեջբերում է նախագահին իր մամլո ծառայությունը:
Ադրբեջանի նախագահը նշել է, որ այդ հակամարտությունը պետք է կարգավորվի Ադրբեջանի տարածքային ամբողջականության շրջանակներում: «Այլ ճանապարհ չկա: ՄԱԿ-ի Անվտանգության խորհրդի չորս բանաձևերը, որոնք պահանջում են հայկական զինված ուժերի անհապաղ և անվերապահ դուրս բերում մեր հողերից, պետք է կատարվեն, ստատուս քվոն պետք է փոփոխվի»,- ընդգծել է նա:
