EgyptAir ավիաընկերության Airbus A320 ինքնաթիռի կործանման կարող էին հանգեցնել անձնակազմի գործողությունները, որոնք արձագանքել են ծխի մասին կեղծ ազդանշանին: Այս մասին հայտնում է The Wall Street Journal-ը՝ հղում անելով ավիաաղետի հետաքննության ընթացքին ծանոթ աղբյուրներին:
Պարբերականի տեղեկությամբ՝ այդ սցենարը աղետը հետաքննող փորձագետները լրջորեն քննարկում են, քանի որ հնարավոր է, որ Airbus-ի այդ մոդելում ծխի հաղորդիչների աշխատելու դեպքում կարող են անջատվել անվտանգության կարևորագույն համակարգեր, այդ թվում՝ թռիչքի ղեկավարման պաշտպանությունը:
Պարբերականը նշում է, որ կործանված ինքնաթիռում տեղադրված են եղել ծխի նոր, ավելի հուսալի հաղորդիչներ: Սակայն դրանցում նույնպես խափանումներ են եղել, թեև շատ ավելի հազվադեպ: Մասնավորապես, Airbus-ում նշել են, որ դրանք կարող են զգայուն լինել փոշու և որոշ աերոզոլների նկատմամբ:
Հիշեցնենք, որ Փարիզից Կահիրե թռչող EgyptAir ընկերության A320 ինքնաթիռը, որում եղել է 66 մարդ, մայիսի 19-ին անհետացել է Միջերկրական ծովի երկնքում, ավելի ուշ ծովում հայտնաբերվել են ինքնաթիռի բեկորները:
Մայիսի 21-ին Ֆրանսիայի քաղաքացիական ավիացիայի հետաքննության և անվտանգության վերլուծության բյուրոն (BEA) հայտնել է, որ EgyptAir ինքնաթիռի ավտոմատ համակարգը կապի կտրվելուց մի քանի րոպե առաջ ազդանշան է ուղարկել սրահում ծխի առկայության մասին: Փորձագետները դա կապել են հրդեհի հետ, որը կարող էր առաջանալ օդաչուների խցիկի մոտ՝ զուգարանում և ռադիոէլեկտրոնային սարքավորման խցիկում:
Մայիսի 24-ին եգիպտական «Ալ-Ահրամ» թերթը հայտնել էր, որ ինքնաթիռի օդաչուների խցիկում ջերմաստիճանի բարձրացման մասին էլեկտրոնային հաղորդագրություններ են ստացվել ռադարներից ինքնաթիռի անհետանալուց 3 րոպե առաջ: