Ավելի քան 150 բժիշկներ ու գիտնականներ ստորագրել են Առողջապահության համաշխարհային կազմակերպության ղեկավար Մարգարետ Չենին հասցեագրված ուղերձը՝ կոչ անելով նրան հասնել բրազիլական Ռիո դե Ժանեյրոյից Օլիմպիադա-2016-ի չեղարկման կամ տեղափոխման՝ Զիկա վիրուսի տարածման սպառնալիքի պատճառով։ Այս մասին հայտնում է Reuters գործակալությունը։
Ուղերձի հեղինակները կարծիք են հայտնել, որ ավելի քան կես մլն զբոսաշրջիկներ կարող են վիրուսը տանել այլ երկրներ։
Իր հերթին Բրազիլիայի առողջապահության նախարարությունը վստահություն է հայտնել, որ Օլիմպիադայի տեղափոխման որևէ անհրաժեշտություն չկա։ Գերատեսչությունում նշել են, որ վիրուսը, ինչպես նաև այլ հիվանդություններ, տարածված չեն օգոստոսին, երբ անցկացվելու են խաղերը։ Գերատեսչությունը նշում է նաև, որ ներկայում Զիկա վիրուսը տարածված է աշխարհի 60 երկրում։