Lenta.ru-ի փոխանցմամբ՝ ամերիկացի երկրաֆիզիկոսները Մարսի վրա հայտնաբերել են սառցե ժամանակաշրջանի գոյության վկայություններ: Գիտնականների կարծիքով՝ ներկայում մոլորակը դուրս է գալիս դրանից և թևակոխում է գլոբալ տաքացման փուլ: Համապատասխան հետազոտությունը հրապարակվել է Science ամսագրում:
Ինչպես Երկրին՝ Մարսին ևս բնորոշ են սառցե ժամանակաշրջաններ: Սակայն Կարմիր մոլորակում դրանք ավելի վառ են արտահայտված, քան Երկնագույն մոլորակում: Դա կապված է Մարսի կողմից իր առանցքի շուրջ պտտվելու մեծ թեքության հետ: Մի քանի հարյուր միլիոն տարում այդ թեքության անկյունը փոխվում է 60 աստիճանով, մինչդեռ Երկրի պարագայում դա կազմել է 2 աստիճան:
Մարսի վրա սառցե վերջին ժամանակաշրջանն ավարտվել է 370.000 տարի առաջ, և հյուսիսային բևեռում կուտակվել է 87.000 կիլոմետր խորանարդ սառույց: Գիտնականներն այժմ հայտնաբերել են սառույցի հալման վկայություններ: Նրանք կարծում են, որ Կարմիր մոլորակի վրա «բևեռային գլխարկը», որի բարձրությունն այսօր կազմում է 200-300 մետր, կարող է ամբողջովին չքանալ մինչև հաջորդ սառցե ժամանակաշրջան:
