Հանրապետական կուսակցությունից ԱՄՆ նախագահի պաշտոնին հավակնող միլիարդատեր Դոնալդ Թրամփը հայտարարել է իր մրցակցի՝ Վերմոնտից դեմոկրատ սենատոր Բերնի Սանդերսի հետ 10 մլն դոլարի դիմաց դեբատներ անցկացնելու իր համաձայնության մասին։ Այս մասին հայտնում է USA Today-ը։
Սանդերսի շտաբը կապվել է Թրամփի հետ այն բանից հետո, երբ ԱՄՆ նախկին պետքարտուղար Հիլարի Քլինթոնը հրաժարվել է Սանդերսի հետ անցկացնել Դեմոկրատական կուսակցության թեկնածուների դեբատների ծրագրված ռաունդներից վերջինը։
«Ես հաճույքով դեբատներ կանցկացնեի Բեռնիի հետ։ Սակայն նրանք նախ պետք է վճարեն»,- ասել է նա՝ ընդգծելով, որ այդ գումարները պետք է ուղղվեն բարեգործությանը։
Ավելի վաղ Թրամփը ABC հեռուստաընկերությանը տված հարցազրույցում հայտարարել էր, որ սենատորի հետ դեբատների անցկացումը նրան կապահովի բարձր վարկանիշով։
