Հնդկաստանի Անդհրա-Պրադեշ նահանգի կապի և մասսայական հաղորդակցությունների նախարարը երկրի ԱԳ նախարարին ուղղված նամակում պատմել է այն մասին, որ Սաուդյան Արաբիայում և Բահրեյնում ծաղկում է միգրանտների առևտուրը, հայտնում է The Independent-ը:
Նրա տվյալներով՝ Անդհրա-Պրադեշ և հարևան Տելանգան նահանգներից կանանց խաբելով տանում են Պարսից ծոցի երկրներ՝ խոստանալով բարձր աշխատավարձեր: Դրանից հետո գործատուներն անհետանում են, իսկ միգրանտ կանայք ժամկետանց վիզաներով ընկնում են բանտեր: Նույն ճակատագրին են արժանանում նաև նրանք, որոնք մեկնում են այդ երկրներ ամուսնանալու համար:
Տեղական դատարանի կողմից այդ կանանց գործերը դիտարկելուց հետո նրանց վաճառում են: Սաուդյան Արաբիայում միջին գինը կազմում է 5.8 հազար դոլար, իսկ Բահրեյնում՝ 2 անգամ պակաս: Փորձագետների տվյալներով՝ այդ երկրների բանտերում գտնվում են 20 հազար խաբված հնդկուհի:
Նախարարն ԱԳՆ-ից պահանջել է հետ կանչել հայրենակցուհիներին և արգելել Բահրեյնի և Սաուդյան Արաբիայի հավաքագրման գործակալությունների աշխատանքը երկրում:
