The Business Year 2016 պորտալին տված հարցազրույցի ժամանակ Ադրբեջանի արտգործնախարար Էլմար Մամեդյարովը մեկնաբանել է ռուս-թուրքական հարաբերությունները:
«Ինչպես Թուրքիայի, այնպես էլ Ռուսաստանի հետ համագործակցությունը դինամիկ զարգանում է գործնականում բոլոր ոլորտներում: Ադրբեջանը հատուկ ուշադրություն է հատկացնում երկու երկրների հետ հարաբերությունների խորացմանը:
Թուրքիայի հետ՝ որպես ռազմավարական դաշնակցի, և Ռուսաստանի հետ՝ որպես ռազմավարական գործընկերոջ, Ադրբեջանի հարաբերություններն ունեն պատմական արմատներ, իսկ ստորագրված փաստաթղթերի ծավալը, ինչպես նաև փոխադարձ կանոնավոր այցերը ամուր կապերի ևս մեկ ապացույց են:
Ռուսաստանի և Թուրքիայի հարաբերությունների ժամանակակից վիճակը ցանկալի չէ Ադրբեջանի համար: Թե՛ Թուրքիան, թե՛ Ռուսաստանը կարևոր դեր են խաղում Հարավային Կովկասի տարածաշրջանում ու նրա սահմաններից դուրս կայունության ու անվտանգության պահպանման համար:
Ադրբեջանը նախկինի նման հետաքրքրված է բոլոր հնարավոր եղանակներում երկու երկրների հետ իր հարաբերությունների ընդլայնմամբ:
Մենք հուսով ենք, որ համատեղ ջանքերի արդյունքում Ռուսաստանի և Թուրքիայի միջև հարաբերությունները կկարգավորվեն երկխոսության ու փոխըմբռնման ճանապարհով»,- ասել է նա:
