Կարմիր գծեր Երևանի գրեթե բոլոր փողոցներում, հարյուրավոր արագաչափեր ու տեսանկարահանող սարքեր Հայաստանի ողջ տարածքում: Վարորդների համար Հայաստանում խուսափել տուգանքներից, եթե ոչ անհնար, ապա չափազանց բարդ է: Ոստիկանությունը, օրինակ, ապրիլ ամսին «Հայփոստ» ընկերությանը, որի միջոցով վարորդներին տեղեկացնում է խախտումների վերաբերյալ, փոխանցել է 490 մլն դրամ: Եթե հաշվի առնենք, որ «Հայփոստ» ընկերության՝ նամակ ուղարկելու ծառայության ամենաբարձր արժեքը 200 դրամն է, ապա բարդ չէ պատկերացում կազմել տուգանքների քանակի մասին:
Իսկ ովքեր և ինչպես են տուգանում խախտում կատարած վարորդներին: Երևանի ճանապարհներին տեսախցիկներ տեղադրած «Security dream» ընկերությունը օրական արձանագրում է մոտ 12 հազար խախտում, որի մոտ հիսուն տոկոսն է տուգանվում:
Վարորդների իրավունքներով զբաղվող փաստաբան Արտակ Խաչատրյանը, համադրելով օրական խախտումների և դրանք ուսումնասիրողների թիվը, արձանագրել է, որ ոստիկանության 14 աշխատակից օրական ուսումնասիրում է մոտ 5000 ակտ:
«Ճանապարհային ոստիկանություն + կարմիր գծեր» ֆեյսբուքյան խմբի անդամ Տիգրան Քեյանը մանրամասնում է՝ խախտումներն ուսումնասիրող ոստիկանության աշխատակիցների թիվը պարզել են սեփական ուժերով:
Քեյանը բազմաթիվ օրինակներից ներկայացրեց մի քանիսը, որոնցում առհասարակ որևէ խախտում չկա:
Այս տեսանյութում հստակ երևում է, որ խախտում է կատարում «Մերսեդես» մակնիշի մեքենան, սակայն արի ու տես, որ ոստիկանության աշխատակիցները փաստերը ուսումնասիրելուց ու համադրելուց հետո որոշել են տուգանել BMW մեքենայի վարորդին, որը, ի դեպ, այս տեսանյութում որևէ խախտում չի կատարել:
Քեյանը մանրամասնում է՝ իրենց դիմումի հիման վրա տուգանքի մասին որոշումը բեկանվել է, սակայն նման օրինակները բազմաթիվ են:
Փաստաբան Խաչատրյանի և Քեյանի ֆեյսբուքյան ուսումնասիրության շրջանակներից դուրս փորձեցինք հենց ոստիկանությունից պարզել, թե 5000 խախտման մասին փաստերը թվով քանի աշխատակից է ուսումնասիրում և համադրում, «Առաջին լրատվական»-ի ոստիկանությանը կատարած հարցումը, սակայն, դեռևս անարձագանք է: