Անդրադառնալով Ս. Սարգսյանի հայտարարությանը, որ հայկական կողմի կորցրած 800 հա տարածքները ռազմավարական նշանակություն չունեն, «Առաջին լրատվական»- ի հետ զրույցում «Հայք» նախաձեռնության անդամ Վարդան Խաչատրյանը նշեց. «Մեկ անգամ ևս հիշենք, որ Ադրբեջանը կիրարկման մեջ չի դրել գլխավոր ռազմական ուժերը, որ ուներ: Պետք է հաշվի առնենք, որ մենք կարող ենք շատ ավելի մեծ պատերազմի մեջ ներքաշվել:
Ես սա չեմ, ասում, որ մենք վախենանք, դրա մասին չէ խոսքը, այլ այն մասին, որ պետք է հաշվի առնել, թե արդյոք Հայաստանի շահերց է բխում համանման պատերազմի մեջ ներքաշվելը, թե ոչ, ինչպիսի հետևանքներ կլինեն: Պետք է ճշգրիտ հաշվարկել՝ ինչ ձեռքբերումներ և ինչ կորուստներ կունենանք, այնուհետև որոշում կայացնել և պատկերացնել, թե հաջորդ քայլերը որոնք պիտի լինեն»:
Վարդան Խաչատրյանի դիտարկմամբ՝ Ռուսաստանին ձեռնտու չէ պատերազմի վերսկսումը, քանի որ նրա «աքիլլեսյան գարշապարն» է տեղաշարժվելու՝ խոսքը Հյուսիսային Կովկասին է վերաբերում. եթե պատերազմ սկսվի Հայաստանի և Ադրբեջանի միջև, ապա Հյուսիսային Կովկասում բոլոր հնարավոր գործընթացները կտրուկ բարձրանալու են, և դրանք լինելու են ընդդեմ Ռուսաստանի, եթե հաշվի առնենք նաև այն հանգամանքը, որ Թուրքիան այսօր դառնում է հակակշիռ Ռուսաստանին:
«Ինչ վերաբերում է ուժային այլ կենտրոններին, եթե մեծ խաղ է, եթե «հրե շապիկի» խնդիր է, այս դեպքում այդ գործընթացները ջրի պղտորում են, որի մեջ ձուկը հնարավոր է որսալ»,- նշեց Վ. Խաչատրյանը:
Տարածքային զիջումների հարցը, ըստ Վ. Խաչատրյանի, շահարկվելու է, այնուամենայնիվ, երբեք ճաքերն ու հակադրությունը չեն հասնի այն մակարդակին, որ հարցականի տակ դնեն մեր ժողովրդի միասնականությունը:
Մանրամասները՝ տեսանյութում: