Ապրիլ ամսին ՊՆ Վազգեն Սարգսյանի անվան ռազմական ինստիտուտի սպանված կուրսանտ Հայկազ Բարսեղյանի գործով դատական նիստերը չեն կայացել։ «Առաջին լրատվական»-ին հայտնել է սպանված կուրսանտի հայրը՝ Արկադի Բարսեղյանը՝ հավելելով, որ հաջորդ դատական նիստը հունիսին է լինելու։
Նրա խոսքով՝ դատական նիստերը չեն կայացել ամբաստանյալ Վարազդատ Սաֆարյանի բացակայության պատճառով։ Արկադի Բարսեղյանի խոսքով ՝ թեև կոնկրետ սպանության մեջ մեղադրվում են կուրսանտներ Վաչե Սահակյանը, Մովսես Ազարյանը, Գնել Թևոսյանը և Նորիկ Սահակյանը, բայց ըստ Բարսեղյանի՝ Վարազդատ Սաֆարյանը ևս մասնակից է եղել. «Երեխու ծեծին մասնակցել է և իրանց հետ ոչ միայն խմել է, այլև ծեծերի էլ է մասնակցել, այդ գիշեր տեղյակ է եղել երեխու սպանության մասին, և ասում են, որ ինքը նույնիսկ գիշերը օգնել է, որ երեխուն կախեն, ու մինչև հիմա ձերբակալված չէ»,- մանրամասնեց Արկադի Բարսեղյանը։
Նա նաև ասաց, որ Վարազդատին հաջողվում է խուսափել ձերբակալությունից ՊՆ-ում աշխատող գնդապետի կոչումով բարեկամի շնորհիվ. «Նախարարը հայտարարում է՝ ով որ խառնվի սպանության գործին, վատ կլինի նրա վիճակը, նախարար, տեսեք ձեր աշխատողներից ոմն գնդապետ խառնվել է, 5-րդ տականքը կալանավորված չէ, չեմ հասկանում ինչ է կատարվել, սա՞ է ձեր արդարությունը»,- նախարարին հարցադրեց Արկադի Բարսեղյանը։ Նա պնդեց, որ վկաների ցուցմունքներն էլ են այդ մասին փաստում։
Մանրամասները՝ տեսանյութում:
