ԱՄՆ Ջորջիա նահանգի Ազգային գվարդիայի Ռազմաօդային ուժերի 116-րդ քաղաքացիական ինժեներական էսկադրիլայի զինծառայողները Հայաստանում են գտնվում ԱՄՆ զինված ուժերի Մարդասիրական քաղաքացիական աջակցության ծրագրի շրջանակում: Ինժեներական անձնակազմը նորոգել է Երևանի թիվ 1 տարեցների խնամքի հաստատության երկրորդ մասնաշենքը՝ փոխել է խնամքի կենտրոնի հատակը՝ տարեցների համար այն ավելի ապահով դարձնելով: Նորոգվել են նաև շենքի սանհանգույցները, կատարվել են կոյուղու, լարանցման բարելավումներ և պատերի հարդարման աշխատանքներ:
Զինծառայողների խոսքով՝ վերանորոգման աշխատանքները հմտությունների ձեռք բերման ու իրական պայմաններում դրանք կիրառելու լավ հնարավորություն են, որը միաժամանակ նպաստում է նաև հայ և ամերիկյան ժողովուրդների երկարամյա բարեկամության խորացմանը։
Ջորջիայի Ազգային գվարդիայի այս ներկայացուցիչները ամերիկյան զինուժի լավագույն կադրերն են, և նրանք անձամբ շփվել ու ծանոթացել են հայ ժողովրդի հետ և այդ տպավորություններն իրենց հետ տուն կտանեն։ Նման աշխատանքների միջոցով և գործակցելով Հայաստանի Հանրապետության կառավարության ու քաղաքացիական հասարակության հետ՝ Ամերիկյան դեսպանատունը ձգտում է բարելավել հայ ժողովրդի կենսամակարդակը և օգնել այս հինավուրց ժողովրդին կերտելու անվտանգ, խաղաղ և բարեկեցիկ ապագա, որին արժանի է հայ ժողովուրդը։
Արդեն երրորդ տարին է, որ Հայաստանում նախագծեր են իրականացվում ԱՄՆ եվրոպական հրամանատարության Մարդասիրական քաղաքացիական աջակցության ծրագրի շրջանակում: