Ռուսական Interfax լրատվական գործակալության փոխանցմամբ՝ Օդեսայի նահանգապետ, Վրաստանի նախկին նախագահ Միխեիլ Սաակաշվիլին մտադիր է ակտիվորեն մասնակցել Վրաստանի խորհրդարանական ընտրությունների նախընտրական արշավին:
«Թող ոչ ոք չկասկածի և ոչ ոք դա չընկալի որպես սպառնալիք, որ ես, բնականաբար, մտադիր եմ ժամանել Վրաստան և ակտիվորեն մասնակցել նախընտրական գործընթացներին, և դա այն պայմաններում, երբ մենք շատ բան ենք անում Ուկրաինայում, և ինձ համար դրանք նույն պայքարի թևերն են:
Ես մտադիր եմ պայքարը շարունակել թե՛ մեզ մոտ՝ Վրաստանում, և թե՛ այստեղ՝ Ուկրաինայում: Ես այդ մասին խոսում եմ ամեուրեք՝ առանց որևէ բացառության»,- ասել է նա:
Սաակաշվիլին ընդգծել է, որ շարունակելու է ղեկավարել իր հիմնած «Միասնական ազգային շարժում» կուսակցությունը. «Ոչ ոք չի վիճարկում, որ այդ կուսակցությունը ստեղծել եմ ես, և որ ես խոսք ունեմ այդ կուսակցությունում:
Անկասկած է, որ առաջիկա խորհրդարանական ընտրություններում հաղթելու է մեր կուսակցությունը, քանի որ այն ստեղծագործ կուսակցություն է: Մեզ մոտ հայտնվել են նոր դեմքեր, որոնք առաջիկա ամիսներին ցույց կտան իրենց»,- ասել է Սաակաշվիլին:
Նա «պաթոլոգիկ ստախոս» է անվանել Վրաստանի նախկին վարչապետ, միլիարդատեր Բիձինա Իվանիշվիլիին՝ ընդգծելով, որ նա իր սպառնալիքներով մահվան հասցրեց Վրաստանի էկոնոմիկայի նախկին նախարար Կախա Բենդուկիձեին (Բենդուկիձեն նախորդ տարի սրտի կաթվածից մահացել է Լոնդոնի հյուրանոցներից մեկում):