Ավելի քան 450 ամերիկացի գրողներ, այդ թվում՝ Սթիվեն Քինգը, ստորագրել են առցանց միջնորդագիր՝ ընդդեմ ԱՄՆ նախագահի պաշտոնում միլիարդատեր Դոնալդ Թրամփի թեկնածության։ Այս մասին հայտնում է RIA Novosti-ն։
Գրողներ Մարկ Սլաուկան և Էնդրյու Ալտշուլը միջնորդագիրը տեղադրել են Ipetitions կայքում, դրա նպատակն է հավաքել 10 հազար ստորագրություն. ներկայում փաստաթուղթը ստորագրել է 6220 մարդ։
«Ո՛չ հարստությունը, ո՛չ փառքը չեն պատրաստում մարդուն նրան, որպեսզի խոսի ԱՄՆ-ի անունից, ղեկավարի երկրի բանակը… կամ ներկայացնի նրա քաղաքացիներին»,- ասվում է միջնորդագրի տեքստում։
Գրողները համաձայն չեն այն բանի հետ, որ պետության ղեկավարի թեկնածու կարող է լինել մարդ, ով խրախուսում է իր կողմնակիցների ագրեսիան, բղավոցով ստիպում իր հակառակորդներին լռել, ահաբեկում հակառակորդներին, վիրավորում կանանց և տարբեր փոքրամասնությունների ներկայացուցիչների։
«Դա մեզնից պահանջում է անհապաղ և վճռական պատասխան»,- նշել են նրանք՝ հավելելով, որ միանշանակ դեմ են Թրամփի թեկնածությանը: