Կառավարության կողմից հաստատվել են բուհերի մասնագիտությունների, ընդունելության քննությունների ցանկը, վճարովի և անվճար տեղերի թիվը: Տեղեկացնում է «Գնահատման և թեստավորման կենտրոնը»-ի տնօրեն Գագիկ Մելիքյանը՝ հավելելով, որ հանրապետության բուհերում այս տարի, ընդհանուր առմամբ, հատկացված տեղերի թիվը 13 հազար 787 է, որոնցից անվճարը` 1783: Այս տարի առաջին փուլի համար ունենք 11 հազար 375 դիմորդ:
Գագիկ Մելիքյանը նշեց, որ արդեն անցկացվել են փորձնական քննություններ, որոնց մասնակցել է 5 հազար դիմորդ: Նրա խոսքով՝ սա դիմորդներին հնարավորություն է տալիս նախապես ծանոթանալ գործընթացին և պատրաստ լինել դրան: Գագիկ Մելիքյանի դիտարկմամբ՝ առարկաների շտեմարանները հասանելի են դիմորդների համար, դրանք բարդ չեն, պարզեցված են։
Գագիկ Մելիքյանի հետ համաձայն չեն 12-րդ դասարանի սաները. եթե կրկնուսույցի ծառայությունից չօգտվեն, չեն կարող բուհ ընդունվել, որքան էլ ընդունվելու գործընթացը պարզեցված լինի։ Ամեն առարկայի համար վճարում են 25-35 հազար դրամ։
Այս տարի առաջին քննությունն անցկացվելու է հունիսի 3-ին, վերջինը՝ հունիսի 24-ին։