ՀՀ սփյուռքի նախարար Հրանուշ Հակոբյանը մայիսի 24-ին ընդունել է ՀՀ-ում Ավստրալիայի նորանշանակ դեսպան Պիտեր Թեշին և արժևորել Ավստրալիայի հայ համայնքի նկատմամբ պետական բարենպաստ քաղականությունը։ ՀՀ սփյուռքի նախարարը շնորհակալություն է հայտնել, որ Ավստալիայի կառավարությունը ստեղծում է բոլոր հնարավորությունները, որ հայերն այդ երկրում ոչ միայն ապրեն ու զարգանան, այլև ակտիվ մասն ակցություն ունենան երկրի քաղաքական, տնտեսական, հասարակական ու մշակութային կյանքին, պահեն պահպանեն ազգային մշակույթն ու լեզուն:
ՀՀ սփյուռքի նախարարության մամուլի եւ հասարակայնության հետ կապերի վարչության փոխանցած հաղորդագրության մեջ նաճ նշվում է. «Նախարարը կարևորեց նաև Ավստրալիայի Նոր Հարավային Ուելս նահանգի օրենսդիր մարմնի կողմից 2009թ. մարտին Հայոց ցեղասպանության ճանաչումը՝ այն որակելով որպես մարդկության դեմ նոր հանցագործությունների կանխարգելման գործոն:
Նախարարը նորանշանակ դեսպանին ներկայացրեց գերատեսչության պետական քաղաքականությունը և այդ քաղաքականության իրականացմանը նպաստող ծրագրերը, ինչպես նաև, նախարարության առաջնային խնդիրներն ու անելիքները:
Նորանշանակ դեսպան Պիտեր Թեշը շնորհակալություն հայտնեց ջերմ ընդունելության և հանգամանալից զրույցի համար, և նշեց, որ Ավստրալիայի հայերը շատ մեծ ներդրում ունեն երկրի մշակույթի, սպորտի և քաղաքականության բնագավառներում»:
