Նախագահական մրցապայքարի նախընտրական շրջանում նախագահի երկու հիմնական թեկնածուները՝ Քլինթոնն ու Թրամփը, կպայքարեն իռլանդական, հրեական և հայկական համայնքների ձայների համար։
Ընտրական գործընթացներին և Ամերիկայի հայ համայնքի դիրքորոշմանը վերջին տարիներին Միացյալ Նահանգների Նյու Յորք քաղաքում բնակվող քաղաքագետ Հայկ Մարտիրոսյանը ներսից է ծանոթ: Չնայած ամերիկահայերն ավանդաբար սատարում են Դեմոկրատական կուսակցության ներկայացուցիչներին, քանի որ ամերիկահայ կազմակերպությունների առաջնորդները միշտ սերտ կապ են ունեցել Կոնգրեսի և Սպիտակ տան բարձրաստիճան դեմոկրատ քաղաքական գործիչների հետ, քաղաքագետն այդուհանդերձ վստահ է՝ դեմոկրատական կուսակցության ներկայացուցչի՝ Հիլըրի Քլինթոնի ընտրվելու պարագայում Ցեղասպանության թեման չի բարձրաձայնվի: Քաղաքագետը նույնը չի կարող ասել Թրամփի ընտրվելու դեպքում:
Հայկ Մարտիրոսյանը կարծում է՝ դեմոկրատներին չաջակցելու պատճառը մեկն է. դեմոկրատ Բարաք Օբաման նախընտրական շրջանում խոստացավ ճանաչել Ցեղասպանությունը, մինչդեռ ընտրվելուց հետո դրժեց խոստումը:
Նախագահի թեկնածուներին պետք է դիտարկել ոչ միայն հայ-թուրքական հարաբերությունների, այլև հայ-ադրբեջանական հակամարտության պրիզմայից: Այս տեսանկյունից քաղաքագետը չի բացառում, որ Քլինթոնը կարող է ադրբեջանամետ դիրքորոշում ունենալ:
Ամերիկայի հայ համայնքի շրջանակում կան նաև Քլինթոնի թեկնածությունը սատարողներ: Ըստ նրանց՝ Քլինթոնը Սենատում բազմաթիվ հայամետ բանաձևերի է աջակցել ` հանդես գալով որպես համահովանավոր: Սակայն Միացյալ Նահանգների պետքարտուղարի պաշտոնում Կոնգրեսի լսումների ժամանակ Քլինթոնը խուսափել է «ցեղասպանություն» եզրույթի կիրառումից: Նրա թեկնածությունը սատարող ամերիկահայերի կարծիքով՝ ի տարբերություն Օբամայի՝ Քլինթոնը դեռ լիովին չի սպառել համայնքի վստահության պաշարը: Ի դեպ, Հիլըրի Քլինթոնը ԱՄՆ միակ պետքարտուղարն է, որ երկու անգամ աշխատանքային այցով ժամանել է Հայաստան։