Այսօր տաքսու վարորդները բողոքի ակցիա էին իրականացնում քաղաքապետարանի դիմաց՝ պահանջելով ավելացնել տաքսիների համար նախատեսված կայանատեղիների թիվը։ Նրանց դիտարկմամբ՝ քաղաքապետարանից տարբեր ժամանակահատվածում խոստումներ լսել են, բայց այդպես էլ իրենց համար կարևոր նշանակություն ունեցող վայրերում չեն կարողանում տաքսին կայանել՝ կարմիր գծերից բացի, օր օրի ավելանում են ծառայողական կայանատեղիները։
Վարորդներին մոտենում է Երևանի քաղաքապետարանի տրանսպորտի վարչության պետ Հենրիկ Նավասարդյանը՝ ակնարկելով, որ նրանց բողոքն անհիմն է՝ իրենց համար նախատեսված 120-ից ավել կայանատեղի կան։
Տաքսու վարորդները կոնկրետ օրինակներ են ներկայացնում։ Առաջարկում են Հենրիկ Նավասարդյանին միասին գնալ Ազատության պողոտա և համոզվել, որ տաքսու վարորդների համար լրացուցիչ դժվարություններ են ստեղված։ Նախկինում «Ոսկե գետակ» խանութի հարևանությամբ կարողացել են մեքենաներ կայանել, հիմա սեփականատերը չի թողնում՝ քաղաքապետարանի տարածքը տրամադրել է վարձակալությամբ ծառայողական մեքենաների համար։ Տաքսիստները պատմեցին, որ «Ոսկե գետակ» խանութ սրահը պատկանում է Գրիգոր Ամալյանին, որը Մանկավարժական համալսարանի դասախոս է, որդին էլ դատավոր է՝ Էդուարդ Ամալյանն է, ուստի, եթե անգամ տվյալ տարածքի բնակիչ է կայանում, սկսում է սպառնալ, նույնիսկ գումար է պահանջում կայանելու համար:
Քաղաքապետարանի ներկայացուցիչն ինչպես և խոստացել էր ժամանեց, միայն թե ոչինչ չփոխվեց՝ ավագանու որոշում կա։
«Ոսկե գետակ»-ի սեփականատիրոջ հետ Հենրիկ Նավասարդյանի ներկայությամբ տաքսու վարարոդներին բանակցել չհաջողվեց, քանի որ Գրիգոր Ամալյանը տեղում չէր։
