«Առաջին լրատվական»-ի զրուցակիցն է նախկին զինդատախազ, ՀԱԿ խմբակցության պատգամավոր Գագիկ Ջհանգիրյանը:
– Պարոն Ջհանգիրյան, վարչապետը մի քանի օր առաջ հայտարարեց կոռուպցիայի և մենաշնորհների դեմ պայքարի մասին, և երեք շաբաթ ժամանակ է տվել՝ գտնելու, հայտնաբերելու, թե ովքեր են մենաշնորհել տնտեսությունը: Ի՞նչ կարծիք ունեք այդ մասին:
– Կոռուպցիայի դեմ պայքարի վերաբերյալ ՀԱԿ-ի հայտարարությանը ավելացնելու ոչինչ չունեմ: Մենք մի շարք նախաձեռնություններ ենք այդ ուղղությամբ ուղարկել, հարցապնդումներ ենք արել և այլն:
– Այնուամենայնիվ, կառավարության նիստին պարզ դարձավ, որ 797 ծառայողական մեքենաներ են կրճատվելու, սրանք կոռուպցիայի դեմ պայքարի հետ ի՞նչ աղերս ունեն:
– Լավ է, վատ բան չէ, եթե կրճատվելու են ծառայողական մեքենաները, բայց այնպես չստացվի, որ կարևոր տեղերում կրճատեն, իսկ անկարևորում՝ թողնեն: Դա շատ կարևոր է, որովհետև պետական պաշտոնյան, հատուկ ծառայություն իրականացնողը, զիծառայողը և այլն, նաև տրանսպորտի անհրաժեշտություն է ունենում, որպեսզի օպերատիվ խնդիրներ լուծի: Դա վերաբերում է քննչական ծառայությանը, հետախուզական ծառայություններին, հնարավոր չէ առանց տրանսպորտի: Ավելին՝ կարող եմ ասել, որ իրավապահ մարմիններում, ըստ էության, տրանսպորտային ծախսերը շատ քիչ են իրականում: Եթե մենք ուզում ենք, որ այդ մարմիններն անկախ գործեն, կապված չլինեն բենզինի, անվադողի հազար ու մի այլևայլ խնդիրների հետ, մենք պետք է լիարժեք ապահովենք նրանց այդ տրանսպորտային միջոցներով և տրանսպորտային ծախսերով, գուցե տրանսպորտային միջոցները քիչ չեն, բայց տրանսպորտային ծախսերը, իմ հաշվարկներով, քիչ են, հատկապես հատուկ ծառայություն իրականացնողների համար: Դրա համար չեմ կարող ասել, թե այդ որտեղ են կրճատվում, որ մարմնում քանի մեքենա է կրճատվում և այլն, իհարկե, եթե կան ավելորդ մեքենաներ, որոնք առավոտից երեկո պաշտոնյաների ընտանիքի անդամներին են ծառայում, անխոս, պետք է կրճատվեն:
– Պարոն Ջհանգիրյան, այս 797 ծառայողական մեքենաների կրճատումից հետո տարբեր ոլորտներում տարբեր գերատեսչությունների ղեկավարներ նշեցին յուրաքանչյուրը 100 մեքենայի կրճատման մասին և այլն, ստացվում է, որ մենք իսկապես անարդյունավետ կառավարման փաստի հետ գործ ունենք այս պահին, սա նշանակում է, որ իշխանությունն ինքն էլ է…
– Ուզում եմ հիշեցնել Վերահսկիչ պալատի ուսումնասիրությունները և տարեկան զեկույցները, 4 տարի է ուզում ենք հասկանալ՝ այդ ուսումնասիրությունների արդյունքներով ինչ մեծության գումար է վատնվում, հափշտակվում, անարդյունավետ ծախսվում կամ յուրացվում: Այդ ուսումնասիրությունների ընթացքում հայտնաբերած խախտումների ինչ մեծության գումար է վերականգնվում: Հաջորդը՝ չվերականգնված խնդիրները, փաստերը եթե ուղարկվում են իրավապահ մարմիններին, ապա այդ ընթացքում ի՞նչ է տեղի ունենում, քանի՞ մարդ է պատասխանատվության ենթարկվում, որպեսզի մենք ասենք՝ այս ծախսը արդյունավետ է կամ արդյունավետ չէ, մենք որևէ վիճակագրական հիմքի վրա պիտի դնենք, մի ստանդարտ պիտի ստեղծենք, որ այդ ստանդարտով կարողանանք առաջ շարժվել, 4 տարի մենք այդպես էլ չենք կարողանում որևէ հստակ, թվային տվյալի տիրապետել:
– Իսկ ի՞նչ եք կարծում, իշխանությունը քաղաքական կամք կարո՞ղ է դրսևորել, թե՞ սա ուղղակի նախընտրական իմիտացիա է, այսինքն՝ նախընտրական պայքարի…
– Դուք պետք է իշխանությանը հարցնեք:
– Իբրև ընդդիմադիր գործիչ Ձեր…
– Օրինակ՝ կոռուպցիայի դեմ պայքարի համար պետական բոլոր կառույցները կան՝ թե՛ օպերատիվ հետախուզական, թե՛ քննչական, թե՛ դատախազական, թե՛ դատական, և ամեն մի գերատեսչություն պարտավոր է իր ներսում, իր կառավարման ոլորտում պայքարել կոռուպցիայի դեմ: Հատուկ հանձնաժողով ստեղծել, պլաններ մշակել, չգիտեմ… բա էդ դեպքում ի՞նչ են անում դատախազությունը, ոստիկանությունը, անվտանգությունը, հարկային, մաքսային մարմինները: Հետո այդ հանձնաժողովը ի՞նչ լիազորություն ունի, ի՞նչ սահմանադրական մարմին է. դա խորհրդակցական մարմին է, խորհրդակցական մարմինը կարող է կոռուպցիայի դեմ պայքարե՞լ: Մենք պետական մարմիններ ունենք, և կոռուպցիայի դեմ պայքարը պետք է առաջինը սկսել կաշառակերության և, այսպես ասած, «պաբոռների» դեմ պայքարից:
– Պարոն Ջհանգիրյան, որտե՞ղ է թաքնված կոռուպցիան, որտեղի՞ց պետք է սկսել կոռուպցիայի դեմ պայքարը: Պարոն Ալավերդյանը մեզ հետ զրույցում ասում էր, որ դա պայմանավորված է նաև նրանով, որ քաղծառայողների, տարբեր գերատեսչությունների ներկայացուցիչները ցածր աշխատավարձ են ստանում:
– Կոռուպցիան չի կարող մասնավոր սեկտորում լինել, այն կարող է լինել պետական կառավարման համակարգում: Մասնավոր սեփականատիրոջից որ աշխատողն ինչքան գողացավ, ինչքան յուրացրեց, ինչքան հափշտակեց, դա այդ մասնավորի և իր աշխատողի խնդիրն է, այդտեղ կոռուպցիա չկա: Կոռուպցիային պարտադիր պետք է առնչություն ունենա պետական կառավարման մարմնի պաշտոնատար անձը կամ որևէ պետական ծառայող, առանց պետական համակարգի առնչության կոռուպցիա չի կարող լինել:
– Իսկ արդյո՞ք գաղտնիք է իշխանությունների համար, թե ովքեր են մենաշնորհել մեր տնտսությունը:
– Ես չեմ կարծում, թե գաղտնիք է, մենք փոքր երկիր ենք, բոլորը բոլորի մասին, ամեն ինչի մասին գիտեն:
– Անուններ կհրապարակվե՞ն, այ ասում են…
– Չգիտեմ, դա իշխանության խնդիրն է: Ես ընդհանրապես այսպես եմ մտածում՝ եթե իշխանությունը որոշել է պայքարել կոռուպցիայի դեմ, ինքը ուրեմն լուրջ լծակ է ստանձնելու հասարակության աչքին իր իմիջը բարձրացնելու: Զարմանում եմ, որ ընդդիմությանը, ոչ իշխանական ուժերին հրավիրում են՝ եկեք մեզ հետ մասնակցեք: Հարգելիներս, ինչո՞ւ եք այդ լրջագույն լծակը ընտրություններից առաջ փորձում բաժանել ընդդիմադիր և ոչ իշխանական ուժերի հետ, Ձեր ինչի՞ն է պետք: Ինքներդ արեք, թող ժողովուրդն էլ տեսնի՝ դուք պայքարում եք, ձեզ 80-90 տոկոս ձայն տա:
– Պարոն Ջհանգիրյան, Ձեր կարծիքը՝ կորցրած 800 հեկտար տարածքի վերաբերյալ, այս օրերին բուռն քննարկվում էր…
– Ես այդ թվային բաների մեջ չեմ մտնի, անվտանգության գոտին կամ ազատագրված տարածքները երաշխավորել են ԼՂ-ի անվտանգ կենսագործունեությունը: Ես կարծում եմ, որ մենք հետագայում էլ պետք է այնպիսի լուծման գնանք, որ Ղարաբաղի մեր ժողովուրդը, հայրենակիցները ևս 1000 տարի, 5000 տարի այդ տարածքում ապահով և անվտանգ ապրեն: Այդ լուծումը գտնելու պատասխանատվությունն իշխանության ձեռքին է:
– Ընդդիմությունը կարծես հենց այս հարցում է, որ աջակցում է 100 տոկոսով:
– Ընդդիմությունն աջակցում է տուն ներթափանցող գողի, ավազակի դեմ պայքարին, որովհետև այդ գողը, ավազակը դրսից է ուզում մուտք գործել մեր երկիր, ՀԱԿ-ը աջակցում է այդ դրսի մարտահրավերների դեմ պայքարին:
