Ճապոնիայում ծնելիությունը 2015թ. հասել է վերջին 21 տարվա առավելագույնին: Այս մասին հայտնում է «Մայնիտի» թերթը՝ հղում անելով երկրի առողջապահության նախարարության տվյալներին:
Ճապոնիայում ծնելիության ինդեքսը, որը չափվում է յուրաքանչյուր կնոջ հաշվով երեխաների միջին թվով, կազմել է 1,46, ինչը 0,04-ով մեծ է նախորդ տարվա համեմատ, և հասել է 1994 թվականից ի վեր ամենաբարձր ցուցանիշի: Այդ ժամանակ ծնելիության ինդեքսը կազմել է 1,5:
Ճապոնիայում 2005թ. ծնելիությունը 1,26 մակարդակին հասնելուց հետո սկսել է աստիճանաբար աճել, բայց 2014թ. կրկին անկում է գրանցվել:
Նախարարության տեղեկությամբ՝ վերջին տարիներին ճապոնական ընտանիքներում ծնելիության աճը կապված է երկրի տնտեսության վերականգնման հետ: Միևնույն ժամանակ, 20-30 տարեկան կանանց թիվը Ճապոնիայում կրճատվում է, իսկ մահացության ցուցանիշները, ինչպես սպասվում է, կաճեն ճապոնական ծերացող հասարակությունում: Ուստի «Մայնիտիի» պնդմամբ՝ երկրի կառավարության համար դժվար կլինի մինչև 2025թ. ծնելիության մինչև 1,8 աճի նպատակին հասնել:
2015թ. Ճապոնիայում ծնվել է 1.005.656 երեխա, բնակչության մահացությունն աճել է մինչև 1.290.428-ի՝ Երկրորդ համաշխարհային պատերազմից ի վեր ամենաբարձր ցուցանիշի: Որպես հետևանք՝ Ճապոնիայի բնակչության թիվը կրճատվել է 284.772 մարդով:
Ճապոնիայի բնակչությունը կազմում է մոտ 126 մլն մարդ: