Բրիտանական հասարակական կարծիքում ակնհայտ բեկում է տեղի ունեցել հօգուտ ԵՄ կազմում Մեծ Բրիտանիայի անդամակցության պահպանման: Այս մասին են վկայում The Daily Telegraph թերթի պատվերով ORB սոցիոլոգիական ծառայության անցկացրած հարցման արդյունքները:
«Հանրաքվեի անցկացումից ընդամենը մեկ ամիս առաջ (ԵՄ-ում) մնալու օգտին արշավը այժմ առաջատար է 13 կետով: ORB-ի վերջին հարցման արդյունքներով՝ անդամակցության պահպանման կողմնակիցները կազմում են 55%, իսկ դուրս գալու օգտին քվեարկողները՝ 42%՝ նրանց շրջանում, ովքեր հաստատ պատրաստվում են քվեարկել»,- նշում է թերթը: Հարցվածների ընդհանուր թվում եվրաինտեգրման կողմնակիցներն առաջատար են 20% առավելությամբ՝ 58% ընդդեմ 38%-ի:
The Daily Telegraph-ը նշում է, որ եվրասկեպտիկների միակ հաղթաթուղթը բրիտանացի ընտրողների համոզվածությունն է, որ հենց իրենք կարող են կատարելագործել բրիտանական միգրացիոն համակարգը: Այդ հարցում ԵՄ-ից դուրս գալու կողմնակիցները կազմում են հարցվածների 50%-ը, նրանց ընդդիմադիրները՝ 29%:
Նշվում է, որ Միացյալ Թագավորության ներկայիս կարգավիճակի պահպանման կողմնակիցների արշավը վերջին օրերին կտրուկ թափ է հավաքում անորոշության և տնտեսական ցուցանիշների վատացման հեռանկարով ընտրողներին վախեցնելու մարտավարությամբ:
ԵՄ կազմում Մեծ Բրիտանիայի անդամակցությունը շարունակելու հարցով հանրաքվեն տեղի կունենա հունիսի 23-ին: