Մայիսի 16-22-ը Ճապոնիայում ջերմային հարվածներով հոսպիտալացվել է առնվազն 688 մարդ։ Այս մասին հայտնում է երկրի գլխավոր հրշեջ վարչությունը, որը կատարում է նաև ԱԻՆ-ի և շտապօգնության գործառույթներ՝ փոխանցում է TASS գործակալությունը։
Գերատեսչության տվյալներով՝ հոսպիտալացվածներից կեսի տարիքը գերազանցում է 65 տարեկանը, մահվան դեպքեր չեն արձանագրվել։ Ճապոնիայում ընդհանուր առմամբ վերջին ամսում շոգից տուժել է մոտ 1700 մարդ, նրանցից մեկը մահացել է։
Անցած շաբաթվա վերջից շոգ եղանակ է հաստատվել երկրի կենտրոնական մասում, այդ թվում՝ մայրաքաղաքի շրջանում, որտեղ ջերմաստիճանի սնդիկի սյունը ցերեկը գերազանցում է 30 աստիճան Ցելսիուսը։ Ճապոնացի օդերևութաբաններն այս տարի շոգ ամառ են կանխատեսում Խաղաղ օվկիանոսում Էլ-Նինո և Լա-Նինյա կլիմայական ֆենոմենների ազդեցության պատճառով։
Անցած տարի Ճապոնիայում շոգի պատճառով մահացել է ավելի քան 100 մարդ, ևս 53 հազարը հոսպիտալացվել են։