«Դիրքերում ամեն ինչ նորմալ է, մեր բանակը, մեր զինվորը տեղում են, եթե տեղում չլինեին, մեզ՝ կամավորականներիս չէին ասի՝ դուք ձեր առաքելությունն արդեն կատարել եք, կարող եք գնալ: Մեր բանակն իր առջև դրված խնդիրները կատարում է լիարժեք,- այս մասին «Առաջին լրատվական»- ի հետ զրույցում ասաց սահմանից օրերս վերադարձած «Ազատամարտիկների դաշինք»- ի խորհրդի անդամ Սամվել Հովսեփյանը, ով առավել հայտնի է Ադմիրալի Սամո անվամբ:
Նրա հավաստմամբ՝ արդեն բավականին շատ բնակիչներ են վերադարձել Մատաղիս. «Թալիշի բնակիչներից էլ արդեն վերադարձողներ կային, մարդիկ իրենց դռների վրա գրել էին. «Ես գյուղում եմ գտնվում, խնդրում եմ ներս չմտնել»:
Անդրադառնալով 800 հեկտար կորուսյալ տարածքների վերաբերյալ հարցին՝ Ս. Հովսեփյանը նշեց. «Մինչև ամսի 6-ը բավականին հետ ենք վերցրել նախկին դիրքերը, ուղղակի ժամանակ չեղավ այդ մնացածն էլ վերցնելու, քանի որ Մոսկվայում հանդիպեցին, պայմանավորվեցին զինադադարի շուրջ: Հիմա այդ պահը չէ, որ հետ վերցնենք և առաջ շարժվենք, քանի որ կա պայմանավորվածություն: Իհարե ամեն սմ-ն մեզ համար թանկ է, բայց այս իրավիճակում, այս արտաքին քաղաքական իրավիճակում գնալ այդ փոքր տարածքի հետևից, ժամանակը չէ: Եթե Աստված չանի, լինի ապրիլի 3-ի, 4-ի իրավիճակը, մենք կգնանք առաջ և ոչ թե 800 հա վերցնելու, այլ մի երկու շրջան կվերցնենք, ևս մի 20 տարի կապահովենք խաղաղությունը, հնարավորություններ կան, բանակը իր տեղում է, զենք-զինամթերքի, մարդկային ռեսուրսի խնդիր չկա»:
Սամվել Հովսեփյանի կարծիքով՝ խաղաղ բանակցություններով ոչ մի հարց չի լուծվելու. «Ղարաբաղյան խնդիրը միայն ու միայն ռազմական ճանապարհով լուծում կստանա՝ կա՛մ մենք իրանց, կա՛մ իրանք մեզ, բայց ավելի շատ հակված եմ մտածելու, որ մենք իրանց… Գալու է այդ իրավիճակը, և մենք էլի տարածքներ ենք գրավելու»:
Անդրադառնալով Ժիրայր Սեֆիլյանի հայտարարությանն այն մասին, որ ինքը պատրաստ է պատասխանատվություն ստանձնել այդ 800 հեկտար տարածքները վերադարձնելու պատասխանատվությունը, Ս. Հովսեփյանն ասաց, որ հարգում է Սեֆիլյանին և նրա անցած ճանապարհը, բայց այս պահին ինքնագործունեությամբ պետք չէ զբաղվել. «Այդ 800 հեկտարը մեր մեկ զինվորի ոտքն անգամ չարժե»:
Մանրամասները՝ տեսանյութում:
