«Երբ Հայաստանի քաղաքացին հասկանում է իր իրավունքը, հասկանում է, թե ինչի համար է ոտքի կանգնել և միասնական է, այդ դեպքում շատ դժվար է հակառակ որոշումների գնալ»,- այս մասին «Առաջին լրատվական»- ի հետ զրույցում ասաց Համահայկական բնապահպանական ճակատի անդամ Լևոն Գալստյանը և հավելեց, որ գառնեցիները ոչ թե հաղթեցին, այլ արդարությունը վերականգնեցին և պահպանման գաղափարի շուրջ համախմբվեով՝ կարողացան ստիպել պետական կառավարում իրականացնող մարմիններին՝ հետ կանգնել իրենց որոշումից:
Գառնի գյուղի բնակիչների պայքարն այս փուլում կարծես թե ավարտվեց հաջողությամբ, օրերս Գառնի ժամանած Հովիկ Աբրահամյանը գյուղացիների հետ հանդիպման ընթացքում լսեց նրանց բողոքները և հայտարարեց, որ Քաղցրաշենի ինքնահոս ոռոգման ծրագիրը կչեղարկվի և շինարարական տեխնիկան դուրս կբերվի Ազատի կիրճից: Գառնեցիները, որ մի քանի շաբաթ պայքարում էին դրա դեմ, պնդում էին, որ այդ ծրագիրն իրականացվում է վարչապետին և նրա հարազատներին պատկանող հողատարածաքների ոռոգումն իրականացնելու համար:
Լևոն Գալստյանը համոզված է, որ արժանահավատ է վարչապետի խոսքը. «Երեք անգամ բանավոր արդեն նույն արտահայտությունն արել է, տարօրինակ կթվա դրանից հետ կագնելը»: Այնուամենայնիվ, գառնեցիները սպասում են կառավարության գրավոր որոշմանը՝ ինչպես որ պետք է լինի օրենսդրությամբ սահմանված կարգով:
Գառնի գյուղի բնակչուհի Արուսյակ Այվազյանի խոսքով՝ հայրենիքն ամեն ինչից վեր է. «Մենք փրկում ենք մեր հայրենիքը, Գառնին կդառնա օրինակ, մենք մտահոգ ենք նաև Գեղարդալճի ճակատագրով»:
Մնարամասները՝ տեսանյութում: