Հանուն Ազատ գետի ազատության գառնեցիներն այսօր վաղ առավոտից շարունակում էին պայքարը. սեփական ուժերով փակել էին Գառնիի միջպետական բոլոր ճանապարհները։ Վճռական են. հենց ճանապարհի մեջտեղում նստելու են այնքան ժամանակ, քանի դեռ խնդրին վերջնական լուծում չի տրվել։
Պահանջն անփոփոխ է. դադարեցնել Ազատի կիրճում վերսկսած աշխատանքը, չաղավաղել տարածքի էկոհամակարգը, Գառնիի ջուրը թողնել գառնեցներին։
Եթե մեկ ամիս առաջ Ազատի կիրճում ընդամենը երկու միավոր շինարարական տեխնիկա էր գործում, այսօր արդեն դրանց թիվը եռապատկվել է։ Շինաշխատաքների ղեկավարն է պատմում։ Աշխատանքը վերսկսել են. փուլ առ փուլ են առաջ գնում, դեռևս ճանապարհն են լայնացնում։
Մինչ Ազատի կիրճում շինարարական տեխնիկան հարմար տեղավորվել է, գառնեցիները շարունակում են պայքարի իրենց դիրքերն ամրացնել։ Ոստիկանների հորդորներին ոչ ոք ականջալուր չէ. ճանապարհը բացելու նախապայմանը մեկն է՝ չեղարկել Քաղցրաշենի ինքնահոս ոռոգման համակարգի ծրագիրը։
Գառնեցիները կրկին շեշտում են՝ ահել-ջահել այս իրավիճակում են հայտնվել վարչապետ Հովիկ Աբրահամյանի, Վերահսկիչ պալատի նախագահ Իշխան Զաքարյանի և այլոց անձնական այգիները ոռոգելու և սեփական շահերին ծառայեցնելու մտադրությունը խափանելու համար։
Պատմում են՝ իրենցից շատերի հետ են սկսել խոսել սպառնալիքների լեզվով։
Բայց ասում են՝ անկոտրում են. չեն հանձնվելու ոչ մի դեպքում։ Քաղցրաշենի ոռոգման համակարգի ծրագիրը կյանքի չի կոչվելու և վերջ։