Այսօր «Արցախի ճանաչման մասին» օրինագիծը չընդգրկվեց ԱԺ նիստերի օրակարգում: Քաղաքագետ Գագիկ Համբարյանի գնահատմամբ՝ սա ժեստ էր Ս. Սարգսյան – Ի. Ալիև հանդիպումից առաջ, որովհետև իշխանություններն ավելի շատ հասկացրեցին միջնորդներին՝ ԵԱՀԿ Մինսկի խմբի համանախագահներին, որ միևնույն է, այդ «դամոկլյան սուրը»՝ Արցախի ճանաչման փաստաթուղթը, կարող են օգտագործել վերջնականապես, եթե միջնորդները կարգի չբերեն Ադրբեջանին:
«Առաջին լրատվական»- ի հետ զրույցում նա հիշեցրեց, որ ՀՀ նախագահն ապրիլյան քառօրյա պատերազմից հետո հայտարարեց երեք նախապայմանների մասին. ըստ քաղաքագետի՝ դրանցից երկուսը շատ կարևոր են՝ առաջինը՝ զինադադարի խախտման դեպքերի հետաքննությունն է, երկրորդը՝ հասցեական մեղադրանքներով հանդես գալը:
Գագիկ Համբարյանի կարծիքով՝ Վիեննայում տեղի ունենալիք հանդիպումը ՀՀ նախագահը կարող է օգտագործել Հայաստանի տեսակետը ԵԱՀԿ Մինսկի խմբի համանախագահ երկրների արտգործնախարարներին հայտնելու համար: Ըստ քաղաքագետի՝ սա կարևոր է, քանի որ, նրա դիտարկմամբ՝ Մինսկի խմբի համանախագահ երկրների հանցավոր լռության և Հայաստանի ու Ադրբեջանի միջև հավասարության նշան դնելու հետևանքն էր այն, ինչ տեղի ունեցավ ապրիլի սկզբին:
«Սերժ Սարգսյանը կարող է Հայաստանի տեսակետները ներկայացնել և հայտարարել, որ եթե երեք նախապայմանները չհարգվեն և չամրապնդվեն ԵԱՀԿ Մինսկի խմբի համանախագահ երկրների կողմից, որպես բանակցային գործընթացի շարունակման նախապայման, ապա Հայաստանը դուրս կգա բանակցային գործընթացից»,- նշեց Գ. Համբարյանը:
Մանրամասները՝ տեսանյութում:
