«Առաջին լրատվական»-ի զրուցակիցն է ԱԺ ԲՀԿ խմբակցության պատգամավոր Վարդան Բոստանջյանը
– ՀՀ Վարչապետ Տիգրան Սարգսյանը կառավարության վերջին նիստում խոսեց կոռուպցիայի մասին, իսկ դրանից մի քանի օր հետո աշխատանքից ազատվեցին առողջապահության երկու փոխնախարարները: Վարչապետը կարծես թե փորձում է տպավորություն ստեղծել, թե պայքարում է կոռուպցիայի դեմ, որքանո՞վ է նման գործելաոճն արդյունավետ:
– Դա մոտեցումներից մեկն է: Բայց ես դեռեւս չեմ կարող ամբողջությամբ պատկերացնել, թե որքան է դրա արդյունավետությունը:
– Իսկ ի՞նչ էր նշանակում Տիգրան Սարգսյանի ելույթը, երբ կոռուպցիան մատնանշեց միայն երկու նախարարություններում` առողջապահություն եւ կրթություն: Կա՞ր, արդյոք, այդ ելույթի տակ քաղաքական ենթատեքստ, եթե նկատի ունենանք, որ վարչապետը բավական սուր արտահայտվեց ԲՀԿ-ական Հարություն Քուշկյանի ղեկավարած Առողջապահության նախարարության մասին:
– Ոչինչ բացառված չէ: Կոռուպցիան երեւույթ է, որը կարող է ծագել մարդկային գործունեության ցանկացած ոլորտում: Իսկ եթե այսօր հիշյալ կառույցների անուններ են տրվում, միգուցե այնտեղ ավելի ցցուն է այդ երեւույթը:
– Փոխնախարարներին աշխատանքից ազատելը բավարա՞ր է կոռուպցիայի դեմ պայքարելու համար:
– Անձամբ ես չեմ մտածում, որ աշխատանքից ազատելը բավարար է: Կոռուպցիայի դեմ պայքարը ենթադրում է ոչ թե աշխատանքից ազատում, այլ` պատասխանատվության ավելի բարձր հարց է: Ցանկացած նման նեգատիվ երեւույթ պետք է համարժեք պատասխանատվության ինստիտուտ ունենա` իրավական հիմքով է սահմանված, թե ինչ ձեւով: Միայն նման պարագայում կարող է ունենալ ազդեցիկ նշանակություն` երեւույթից ազատվելու, այն մեղմելու, թուլացնելու համար:
– Շատերը կարծում են, որ կատարվածն ընդամենը շոու է` ցույց տալու համար, որ պայքարում են կոռուպցիայի դեմ: Ավելին, Տիգրան Սարգսյանի ելույթը շատ սուր էր Առողջապահության նախարարության մասին խոսելիս, իսկ Կրթության եւ գիտության նախարարության դեպքում` բավական մեղմ էր:
– Ես չեմ ուզում այս խնդրին նայել որեւէ քաղաքական ուժի դիրքերից` որպես ԲՀԿ-ական պատգամավոր: Սակայն իմ տիրապետած ինֆորմացիան թույլ է տալիս ասելու, որ Առողջապահության նախարարությունը ոչ միայն Հարություն Քուշկյանի ղեկավարման ժամանակ, այլեւ նախկինում էլ եղել է ամենաբարձր նախարարություններից մեկը: Բարձր է եղել որակական առումով, պետական գործառույթները լավ իրականացնելու, առողջապահական ոլորտում բարեփոխումներ իրականացնելու առումով: Այս շարանը կարող եմ անընդհատ շարունակել:
– Այդ դեպքում ինչպե՞ս հասկանանք Տիգրան Սարգսյանի ելույթը, արդյո՞ք սրա տակ իրոք քաղաքական ենթատեքստ չկա:
– Ես ոչինչ չեմ բացառում:
